Վրաստանի վարչապետ Մամուկա Բախտաձեն հայտարարել է, որ «Ռուսթավի-2» հեռուստաընկերության հաղորդավարի՝ Ռուսաստանի նախագահ Վլադիմիր Պուտինին ուղղված վիրավորական խոսքը Վրաստանի նախկին առաջնորդ Միխայիլ Սահակաշվիլու սադրանքն է: Այս մասին հաղորդում է Վրաստանի Առաջին ալիքը՝ գրում է rbc.ru-ն:
Բախտաձեի կարծիքով՝ անընդունելի խոսքերը մեկ լրագրողի հայտարարություն չէին: «Սա ագրեսիա է վրաց ժողովրդի դեմ, որը տարիներ շարունակ գոյություն է ունեցել, և որը գալիս է Միասնական ազգային շարժումից և նրա առաջնորդից (Սահակաշվիլուց, RBC)», – ասել է նա: Նրա խոսքով՝ եթերում ասվածը անբարոյական վարքի և սադրանքի օրինակ էր՝ ուղղված Վրաստանի ապակայունացմանը և ազգային շահերին վնաս հասցնելուն: