«Այն, ինչ տարիներ շարունակ տեղի է ունեցել Ալավերդիում, անթույլատրելի է։ Մենք թույլ չենք տալու, որ այդ վիճակը շարունակվի։ Բացառված է, որ Ալավերդու պղնձաձուլական կոմբինատը նախկինի պես աշխատի՝ անտեսելով բնապահպանական չափանիշները։ 19 տարի շարունակ ձուլարանի հետ կապված հսկողություն կառավարության, պետության կողմից չի եղել։ Մեկը չի եկել ասի՝ ժողովուրդ, այս ինչ եք անում, դուք կառավարության տրամադրած թույլտվությունը 8 անգամ գերազանցում եք։ Բայց հիմա եկել է նոր կառավարություն և ասում է, որ այս վիճակն անթույլատրելի է»,- «Առաջին լրատվական»-ի հետ զրույցում ասաց ԱԺ «Իմ քայլը» խմբակցության պատգամավոր Արեն Մկրտչյանը։
Մկրտչյանն ասաց, որ չգիտի, թե նախկին իշխանությունները ինչու չեն բարձրաձայնել այդ հարցերը, ինչու են թույլ տվել, որ այդ բարձիթողի վիճակը շարունակվի։ Բայց, Մկրտչյանի խոսքերով, շատ քաղաքացիներ պնդում են, որ Սերժ Սարգսյանի հետ հարաբերությունները թույլ են տվել, որ գործարանում ստուգումներ չլինեն։
Ինչ վերաբերում է ստուգումներին, ապա Մկրտչյանը նշեց, որ իրենց համար շատ կարևոր է 630 աշխատողների հարցը, բայց, միևնույն ժամանակ, կարևոր է նաև մնացած 15 հազար քաղաքացիների առողջությունը։ Պատգամավորի խոսքերով՝ հարցն ունի և՛ տնտեսական, և՛ սոցիալական կողմ, ու պետք է ընտրել ոսկե միջինը։ «Իմ կարծիքով՝ կարելի է թույլատրելիի չափով ձուլել այնքան, որպեսզի հնարավոր լինի վճարել 630 աշխատողների աշխատավարձերը, և արտանետումները շատ չլինեն, մինչև չինական կողմի հետ բանակցությունները նոր թափով սկսեն ու այդ տարածքում նոր արտադրություն հիմնվի»,- ասաց Մկրտչյանը՝ հավելելով, որ հիմա կառավարությունն է բանակցում ընկերության հետ, և առաջարկների քննարկումները նրանց տիրույթում են։ Բայց այնպես չէ, որ իրավիճակը պատային է։ Մկրտչյանը, սակայն, նշեց, որ ինքը 50 աշխատողների աշխատանքի պահով զրուցել է Թեղուտը շահագործել պատրաստվող ռուսաստանցի գործարար Նորիկ Պետրոսյանի հետ, ու Ալավերդու պղնձաձուլական գործարանի այդ 50 աշխատողը կտեղափոխվեն Թեղուտ։ Այդ թիվը առաջիկայում գուցե ավելանա։
Ինչ վերաբերում է Թեղուտի ներկա վիճակին, ապա Մկրտչյանն ասաց, որ արդեն 750-800 մարդ ներգրավված է աշխատանքներում, թիվը կհասնի 1200-ի։ Պատգամավորը, սակայն, նշեց, որ Թեղուտում խնդիրներ կան։ «Մարդիկ, որոշակի ուժեր, որոնք նախկինում որոշակի պայմանավորվածություններ են ունեցել սեփականատերերի հետ և, կտրվելով իրենց եկամուտի աղբյուրներից, փորձում են վտանգավոր խաղեր խաղալ՝ սոցիալական հողի վրա թշնամանքի ձգտող հակամարտություն ստեղծել համայնքների միջև»։
Առավել մանրամասն՝ տեսանյութում։
