Անդրադառնալով հունիսի 1-26-ին ՀՀ մշակույթի նախարարության աջակցությամբ, «ՀԱՅՖԵՍՏ» միջազգային թատերական փառատոնի կազմակերպած՝ Հայաստանի փայլուն մասնակցությանը աշխարհի խոշորագույն և ամենաճանաչված միջազգային փառատոն-ցուցահանդեսին՝ «Պրահայի քվադրինալե»-ին և «Սպիտակ գիշերները Պերմում» արվեստների փառատոնին՝ «ՀԱՅՖԵՍՏ» միջազգային թատերական փառատոնի նախագահ Արթուր Ղուկասյանը ասաց, որ «Սպիտակ գիշերներ Պերմում» փառատոնի շրջանակներում հնարավորություն է ընձեռվել բացելու «Մեծ Կովկասի օրերը Պերմում» նախագիծը, որին մասնակցել են Ինգուշեթիան, Ադրբեջանը, Դաղստանը, Իրանը և Հյուսիսային Օսիան. «Հայկական կողմը հանդես եկավ կինոծրագրով, որի շրջանակում ցուցադրվել են «Խճճված զուգահեռներ», «Վերջին լարախաղացը», «Բաց երկնքի տակ», «Աշնան արև» ֆիլմերը:
Թատերական ծրագրում հանդես եկավ Երևանի Հովհ. Թումանյանի անվանտիկնիկային թատրոնը՝ իր «ԱԿ-ԱԿ» ներկայացումով, «ՄԻՀՐ» թատրոնն էլ հանդիսականի դատին հանձնեց «Գույներ» և «Սև ամրոց» ներկայացումները»: «Սպիտակ գիշերներ» արվեստների փառատոնին համերգային ծրագրով իր մասնակցությունն է բերել նաև «Art Voices» ջազային սեքստետը:
«Պրահայի քվադրինալե» նախագծի հեղինակ, համադրող Նելլի Բարսեղյանն իր խոսքում շնորհակալություն հայտնեց ՀՀ մշակույթի նախարարությանը, որ գնահատել է իրենց առաջարկը և աջակցություն ցուցաբերել, ապա հավելեց. «Փառատոնը անցկացվում է 1967 թվականից Չեխիայի մշակույթի նախարարության, Եվրամիության և «ՍNEՏCՕ»-ի կողմից՝ Չեխիայի նախագահի հովանու ներքո: Եվ ինչպես հուշում է փառատոնի անվանումը, այն անցկացվում է չորս տարին մեկ: «Պրահայի Քվադրինալե»-ի 40 տարիների ընթացքում իրենց աշխատանքներով ներկայացել են այնպիսի լեգենդներ, ինչպիսիք են Սալվադոր Դալին, Օսկար Նիմեյերը, Տադեուշ Կանտորը, Ժոզեֆ Սվոբոդան, Դավիթ Բորովսկին և այլք: Ամեն մի տաղավար բնութագրում էր տվյալ երկիրը։ Հայաստանի տաղավարը ներկայացված էր գլանափաթեթի տեսքով, որով փորձում էինք մաքրել հիշողության փոշին, գլանափաթեթի շրջանակները հենց այդ էին խորհրդանշում։ Հայաստանի տաղավարը մեծ հետաքրքրություն է առաջացրել մասնագետների և այցելուների շրջանում՝ հնարավորություն ընձեռելով բացահայտել ու ճանաչել Հայաստանը: Ի դեպ, այս տարի գրանցվել է այցելուների աննախադեպ թիվ՝ շուրջ 40,000»։
«ՀԱՅՖԵՍՏ» միջազգային թատերական փառատոնի նախագահ Արթուր Ղուկասյանի խոսքով՝ սա «ՀԱՅՖԵՍՏ»-ի հերթական նախագիծն էր օտարներին՝ «Քվադրինալե»-ի տասնյակ հազարավոր մասնակիցներին հաղորդակից դարձնելու հայկական արվեստի ժանրերին, թատերարվեստին ու հայ թատրոնի պատմությանը, փորձի փոխանակման միջոցով խթանելու ժամանակակից հայ թատրոնի զարգացումը. «Պրահայի Քվադրինալեն» աշխարհի խոշորագույն և ամենաճանաչված միջազգային թատերական փառատոնն է բեմական ձևավորման ոլորտում՝ բաղկացած երեք մասնաբաժիններից (բեմանկարչություն, զգեստների, լուսային և երաժշտական ձևավորում), որոնց ընթացքում տեղի են ունենում բազմաբնույթ ցուցադրություններ, սիմպոզիումներ, քննարկումներ, վարպետության դասեր և այլն»:
