Հայաստանի վարչապետ Նիկոլ Փաշինյանը հայտարարել է ուժային կառույցների մի շարք ղեկավար պաշտոնյաների նոր կոչումներ շնորհելու որոշման մասին: Մասնավորապես, ԱԱԾ պետ Արթուր Վանեցյանն ու ոստիկանապետ Վալերի Օսիպյանը կստանան գեներալական կոչում՝ գեներալ-մայորի կոչում: Գեներալ-մայորի կոչում է ստանում նաև Պետական պահպանության ծառայության ղեկավար Գրիգորի Հայրապետովը: Հայաստանի ԶՈՒ կապի զորքի պետը կստանա գեներալ-մայորի կոչում, իսկ ԶՈՒ գլխավոր շտաբի պետի առաջին տեղակալ Օնիկ Կարապետյանը՝ գեներալ-լեյտենանտի: Արդարադատության երրորդ դասի պետական խորհրդականի աստիճան են ստացել նաև Գլխավոր դատախազ Արթուր Դավթյանը, Քննչական կոմիտեի և ՀՔԾ ղեկավարները:
Իհարկե, Փաշինյանի նախաձեռնությունը վերաբերում է գրեթե բոլոր ուժային կառույցներին, սակայն ակնհայտ է, որ հանրության ուշադրության կենտրոնում հայտնվել են հիմնականում Արթուր Վանեցյանի ու Վալերի Օսիպյանի գեներալական ուսադիրները։
Սակայն այս պարագայում առաջանում են մի շարք հարցեր։ Արդյոք Փաշինյանն արժևորե՞լ է այս երկու պաշտոնյաների գործունեությունը՝ փաստորեն ամրագրելով, որ նրանց մեկ տարվա պաշտոնավարումն արդյունավետ է, թե՞ գործ ունենք սովետական իներցիայի հետ, երբ «պագոնի» վրա «աստղերի» ավելացումը շատ դեպքերում խորհրդանշում էր անցում «վաստակած» հանգստի։
Սակայն այսօրվա «գեներալական աստղերի» նշանակությունը քննարկելի է ոչ միայն այս հարթության վրա։ Ուշագրավ է, որ Վանեցյանն ու Օսիպյանը գեներալներ են դառնում միայն այսօր, երբ, ըստ էության, «գեներալական» պաշտոններ են զբաղեցնում մեկ տարուց ավելի։ Արդյոք սա նրանց աշխատանքի գնահատո՞ւմն է, թե՞ հանրային տրամադրությունների փոփոխության ցուցիչը։ Նիկոլ Փաշինյանը հեղափոխության հաղթանակից հետո ուներ աննախադեպ հանրային աջակցություն, սակայն վերջին ամիսներին նկատվում է նրա վարկանիշի էական անկում։ Եվ ահա՝ ոստիկանապետն ու ԱԱԾ տնօրենը գեներալական ուսադիրներ են ստանում այս համատեքստում։ Կարելի է արձանագրել, որ ստեղծված նոր իրավիճակում Նիկոլ Փաշինյանն արժևորում է ուժայիններին՝ հընթացս արձանագրելով իշխանության հիմնական հենարաններին։
Իհարկե, օբյեկտիվ լինենք՝ Փաշինյանի այսօրվա նախաձեռնությունը կարող է նշանային լինել նաև այն իմաստով, որ երկրում շարունակում է դոմինանտ մնալ հին համակարգի ապամոնտաժման գործընթացը, ինչի ավանգարդում ուժային կառույցներն են։
Մյուս կողմից՝ չենք կարող չնկատել մի հանգամանք ևս, որն ուղղակի ազդեցություն չունի գեներալական կոչումներ շնորհելու հետ։ Զինվորական կոչումներ երկրում շնորհում է երկրի նախագահը, իհարկե՝ վարչապետի նախաձեռնությամբ։ Սակայն իր նախաձեռնության մասին Նիկոլ Փաշինյանը հրապարակայնացրել է մինչև այն պահը, երբ կստորագրվեին նախագահական հրամանագրերը։ Այնպիսի տպավորություն է, որ երկրում շարունակվում է երկրի նախագահի ու վարչապետի հակադրությունը, ու Նիկոլ Փաշինյանը ֆեյսբուքյան իր գրառումով ցանկացել է ցույց տալ, թե ով է երկրի իրական տերը։
Մյուս կողմից՝ թերևս չարժե հեռուն գնացող հետևություններ անել, որովհետև Հայաստանում շարունակվում է գործել հեղափոխական, ոչ համակարգային ռեժիմը, ինչի ականատեսն ենք լինում մեր կյանքի բոլոր ոլորտներում ու բազմաթիվ առիթներով:
