Սևանա լճից ջրբացթողումների և Սևանում ձկնաբուծության համալիր ծրագիրն իսկական աղետ է լճի համար և մի շարք վտանգներ է պարունակում»,- այսօր լրագրողների հետ հանդիպման ժամանակ հայտարարեցին մի շարք բնապահպանական հասարակական կազմակերպությունների ներկայացուցիչներ, ովքեր պատրաստվում են բաց նամակով դիմել Սերժ Սարգսյանին, որպեսզի միջամտի ծրագրի՝ այդ տեսքով ընդունման գործընթացին:
Առաջիկա օրերին ԱԺ-ում պետք է քննարկվի կառավարության կողմից ներկայացված այդ ծրագիրը, որով, հիշեցնենք, նախատեսվում է 5 տարի ժամկետով Սևանա լճից օրենքով սահմանված առավելագույն չափաքանակից ավելի՝ լրացուցիչ 70 միլիոն խմ ջուր բաց թողնել, ինչպես նաև Սևանա լճում կառուցել մասշտաբային՝ 74 ձկնաբուծարան:
«Սևանի մասին օրենքը սիստեմատիկաբար ոտնահարվում է: Փորձանքը փորձանքի հետևից կախվում է Սևանի գլխին: Սա առաջին ոտնձգությունը չէ: 2009-ին մի այդպիսի աղետալի դեպք եղավ: Հաջորդ աղետն այն էր, որ Սևան լցվող փոքր գետերի վրա ՀԷԿ-եր կառուցվեցին: Իսկ հիմա նոր ոտնձգություն է իրականացվում: 74 ֆերմաներում նախատեսվում է 50 հազար տոննա ձուկ աճեցնել, 50 հազար տոննա ֆորսֆորական-ազոտական հիմքերով կեր լցնել ջուրը, որը շատ վտանգավոր է լճի ճահճացման հետ կապված»,-ասաց «Սևանի մասին օրենքի» համահեղինակ, ՀՀ Ազգային ժողովի 1999-2003 թթ. 2-րդ գումարման սոցիալական, առողջապահության և բնապահպանության հարցերի մշտական հանձնաժողովի նախագահ Գագիկ Թադևոսյանը:
Նա այս ծրագիրը բիզնես պրոյեկտ անվանեց, քանի որ աճեցված ձկան պաշարների միայն 1.5 տոկոսն է բաց թողնվելու լիճ, իսկ մնացածը վաճառվելու է: «Եթե այդ ձուկը աճեցվեր և բաց թողնվի լիճ, կասեինք՝ գլուխը քարը, բայց սա բիզնես պրոյեկտ է: Պետք է այդ ձուկը աճեցվի, տանեն Փակ շուկա ու կիլոգրամը 6 հազար դրամով վաճառեն. այդ փայտյա ձուկը, որը ուտելու բան չի: Մարդիկ ասում են, որ այդ ձուկը գցում ես շան առաջ, չի ուտում: Սա բիզնես է. առանց մի լումա ներդնելու՝ ձուկ են աճեցնելու և բիզնես անեն»,- ավելացրեց նա:
Ջրային էկոհամակարգերի մասնագետ Սեյրան Մինասյանի համար էլ անընդունելի և չհիմնավորված են այս երկու ծրագրերին հավանություն տվողների մեկնաբանությունները: Ըստ նրա՝ այս ծրագրերը լուրջ վտանգ են պարունակում ազգային անվտանգության, էկոլոգիական, տեղեկատվական, գիտահետազոտական առումներով:
Բանախոսները չցանկացան ասել, թե ում են պատկանում Սևանա լճում կառուցվող ձկնաբուծական ֆերմաները՝ չհերքելով, սակայն, որ դրա հետևում որոշ պաշտոնյաներ են կանգնած: «Հայկական բերքի առաջմղման կենտրոն» ՓԲԸ-ն, որը և իրականացնելու է այս ծրագիրը, մասամբ պատկանելու է պետությանը և կառավարությանը, նշանակում է, որ դրա հետևում իրականում կան որոշ պաշտոնյաներ, բայց կոնկրետ անուններ չգիտենք»,-ասաց տիկին Զարաֆյանը:
Ասուլիսի վերջում մոտ 50 ՀԿ-ների անունից ծրագրերի հետ կապված մտահոգություններով նամակ ստորագրվեց, որն այսօր պետք է հանձնվի Սերժ Սարգսյանին և կառավարություն: «Մենք հավատում ենք հանրապետության նախագահին և հավատում ենք, որ նա չի թողնի, որ իրականացվի այս ապազգային ծրագիրը»,- հայտարարեցին նրանք:
