ՀՀ գիտությունների ազգային ակադեմիայի շենքի առջև հավաքվել են մի քանի տասնյակ երիտասարդ գիտնականներ, ովքեր բողոքում են պարտադիր կուտակային կենսաթոշակային համակարգի հետևանքով իրենց աշխատավարձերից կատարված պահումների դեմ:
Երիտասարդները 100-ից ավել ստորագրություններով դիմում-նամակ են հանձնել տնօրինությանը: Ակադեմիայի գործավարուհին, որը երիտասարդների պահանջով դուրս էր եկել դիմումը ստանալու, լրագրողներին վստահեցնում էր, թե շենքում տնօրինությունից մարդ չկա:
Լրագրողները գիտնականների հետ մուտք գործեցին շենք և ԳԱԱ նախագահ Ռադիկ Մարտիրոսյանին գտան տեղում: Վերջինս նախապես չէր ցանկանում հանդիպել լրագրողներին՝ պատճառաբանելով, որ քաղաքակիրթ եղանակ գոյություն ունի, պետք էր նախապես զգուշացնել: ԳԱԱ նախագահը պնդում է, որ անձամբ ճանաչում է երիտաարդ գիտնականներից շատերին, սակայն բակում հավաքվածների դեմքերն անծանոթ են, ուստի հիմքեր ունի կարծելու, որ նրանք ակադեմիայի գիտնականներ չեն:
Այս պահին երիտասարդները ոտքով շարժվել են ՍԴ՝ նույնաբովանդակ նամակ հանձնելու:
