Մալայզիացի քննիչները դիտարկում են այն վարկածը, որ Malaysia Airlines ավիաընկերության օդանավը ռադարներից անհետանալուց հետո կարող էր ուղևորվել Աֆղանստանի կամ Պակիստանի՝ «Թալիբան» շարժման գրոհայինների կողմից վերահսկվող տարածք: Այս մասին գրում է Independent-ը:
Հետաքննությանը մոտ աղբյուրը պարբերականին հայտնել է, որ քննիչները դիվանագիտական թույլտվության են սպասում այդ վարկածը ստուգելու համար: «Ինչ վերաբերում է Պակիստանին և Աֆղանստանին, մենք չենք կարող ուսումնասիրել այդ վարկածները առանց նրանց թույլտվության: Մենք հույս ունենք դա ստանալ մոտ ժամանակներս»,- պարբերականին հայտնել է Malaysian Airlines-ի ներկայացուցիչը:
Պակիստանի քաղավիացիայի ներկայացուցիչներն արդեն հայտարարել են, որ ռադարների տեսագրությունների ստուգման արդյունքներով՝ անհետացած օդանավի հետքերը հայտնաբերել չի հաջողվել:
