«Քաղաքացիական պայմանագիր» կուսակցության երեկ տեղի ունեցած համաժողովը դեռևս քննարկվում է վերլուծական շրջանակներում: Վարչապետ Նիկոլ Փաշինյանը համաժողովին իր ելույթում նշեց. «Քաղաքական իմաստով մենք լիբերալ չենք, ցենտրիստ չենք, սոցիալ-դեմոկրատ չենք, մենք քաղաքացիական կուսակցություն ենք: Սա նշանակում է, որ մենք մեզ դուրս ենք դնում գաղափարախոսական ստանդարտներից և ձևավորում ենք գաղափարական նոր հարթություն, որը հիմնված 4 առանցքային սյուների վրա՝ պետականություն, քաղաքացիություն, ազգային ինքնություն, անհատականություն»:
Թեմայի շուրջ «Առաջին լրատվական»- ի հետ քննարկմանը մասնակցեցին Գերագույն խորհրդի նախկին պատգամավոր Ազատ Արշակյանը, քաղտեխնոլոգ Արմեն Բադալյանը և վերլուծաբան Դավիթ Հովհաննիսյանը:
«Թույլ է տրվել կոպիտ սխալ: Մինչ համաժողովը պետք է նախավարժանք արվեր, այդ ընտրությունները պետք է մի անգամ փորձակվեին: Համաժողովն ինքանբուխ էր, ՔՊ վարչության ընտրությունը լյուստրացիա էր, այդպես կուսակցությունը թիրախավորվում է: Վարչության 21 անդամներից երկուսն են կին, դա կոպիտ սխալ է՝ նաև հաշվի առնելով այն, որ այդ կուսակցության կանայք բավականին աշխույժ են… Կուսակցությունը շեղվել է իր քաղաքական գծից»,- նշեց Ազատ Արշակյանը՝ հավելելով, որ քաղաքական քննարկում տեղի չունեցավ, միաձայն ընտրություններ էին: ««Սցենարիստ» Փաշինյանը պետք է աշխատի իր թիմի հետ»,- ընդգծեց նախկին պատգամավորը:
Դավիթ Հովհաննիսյանի դիտարկմամբ՝ ՔՊ վարչության ընտրությունները կանխատեսելի էին. «21 հոգի է ընտրվել, բոլորը ՔՊ հիմնադիրների կազմից էին՝ բացառությամբ Արսեն Թորոսյանի»:
«Կարևոր նորությունը վարչապետի ելույթի քաղաքական մեսիջն էր, մնացած ամեն ինչը նախկինում ասվել էր: Խոսքն այն մասին էր, որ հեղափոխությունից հետո որոշ քաղաքական ուժեր, որոնք իրենց հետ տարիներ շարունակ պայքարել են նախկին ռեժիմի դեմ, այսօր հայտնվել են լուսանցքում,- նշեց վերլուծաբանը»:
«Նիկոլ Փաշինյանը չցանկացավ դառնալ ՔՊ նախագահ…,- նշեց Արմեն Բադալյանը:- Հարց է առաջանում, ինչ-որ մեկը իրո՞ք մտածում է, որ կուսակցության ղեկավարը տարածքային կառավարաման նախարարն է լինելու: Միևնույն է, կուսակցության մեջ որոշողը վարչապետն է լինելու»: Քաղտեխնոլոգի դիտարկմամբ՝ տրամաբանական կլիներ, եթե վարչապետն՝ ինքը դառնար կուսակցության ղեկավար:
«Վարչապետի ելույթում «իզմեր»-ից հրաժարվելու, գաղափարախոսական ստանդարտներից դուրս գալու և գաղափարական նոր հարթություն ձևավորելու մասին հայտարարությունը Ազատ Արշակյանը բնորոշեց որպես «ֆինտ». «Քաղաքական «ֆինտ» էր, «պրյոմ» էր դա… »:
Մանրամասն՝ տեսանյութում: