Այսօր տեղի է ունեցել ՀՀ կառավարության նիստ, որը վարել է ՀՀ վարչապետ Տիգրան Սարգսյանը։ Նիստից առաջ վարչապետը ներկայացրել է պետական ծառայությունների մատուցման մոնիտորինգի արդյունքները, որոնք վկայում են, որ դիտարկված որոշ ոլորտներում կոռուպցիոն ռիսկերը նվազել են:
ՀՀ կառավարությունը հավանություն է տվել ՀՀ հողային օրենսգրքում, Տեղական ինքնակառավարման և Երևան քաղաքում տեղական ինքնակառավարման օրենքներում փոփոխություններ կատարելու օրենքների նախագծերի փաթեթին, որով առաջարկվում է հստակեցնել համայնքի ղեկավարի լիազորությունը համայնքային սեփականություն հանդիսացող հողամասերն օտարելու ժամանակ՝ դրանով իսկ կրճատելով հնարավոր կոռուպցիոն ռիսկերը։
Գործադրի հավանությունն է ստացել «Հեռուստատեսության և ռադիոյի մասին» ՀՀ օրենքում լրացում և փոփոխություն կատարելու օրենքի նախագիծը, որով ակնկալվում է բարելավել լսողության խանգարում ունեցող անձանց տեղեկատվություն ստանալու հնարավորությունը։
Կառավարությունը քննության է առել «Գովազդի մասին» ՀՀ օրենքում լրացում կատարելու օրենքի նախագիծը, որն օրենսդրական նախաձեռնության կարգով ներկայացրել են Ազգային ժողովի մի խումբ պատգամավորներ։ Նրանց առաջարկը, ըստ կառավարության եզրակացության, շեղվում է երկրի որդեգրած եվրաինտեգրման քաղաքականությունից, ուստի ընդունելի կհամարվի նախագծի հեղինակների հետ համաձայնեցված տարբերակը։
Վերը նշված օրենքների նախագծերը և կառավարության եզրակացությունը սահմանված կարգով կներկայացվեն ՀՀ Ազգային ժողով։