Անկախ նրանից, որ հատկապես վերջին մի քանի օրերի ընթացում իշխանության ներկայացուցիչները լոյալ են արտահայտվում ոչ իշխանական չորս ուժերի համախմբման վերաբերյալ, գործնականում իշխանությունն ամեն ինչ անում է՝ խոչընդոտելու այդ համագործակցությանը: Մարտի 14-ին ԱԺ ճեպազրույցների ժամանակ այս մասին նշեց «Ժառանգություն» խմբակցության ղեկավար Ռուբիկ Հակոբյանը:
«Ես հասկանում եմ նրանց մտահոգությունը, որովհետև անկախ նրանից՝ ինչ ձևակերպումներ կտան, նրանցից ոմանք ամբողջական իշխանափոխություն կպահանջեն, ոմանք՝ մշակել ճանապարհային քարտեզ, տակտիկական առումով ճիշտ կլինի Կառավարության հրաժարականի հարցը դնել, բայց շատ լավ հասկանում են, որ այս համագործակցության արդյունքում, որին ոչ միայն խորհրդարանական ուժեր կմիանան, տեղի է ունենալու իշխանափոխություն»,- ասաց նա: Հակոբյանը նշեց, որ իրենք ամբողջական իշխանափոխության կողմնակից են, համակարգային արմատական փոփոխությունների, կարծում են՝ նրանք, ովքեր պայքարում են դրա դեմ, պետք է հրաժարական տան: 4 ոչ իշխանական ուժերն, ըստ Հակոբյանի, իրենց համախմբմամբ որևէ մեկին չեն պատրաստվում ուղարկել քաղաքական աղբանոց, ոչ էլ որևէ մեկն է պատրասատվում իրենց ուղարկել, ուղղակի ընդդիմությունը պայքարում է այսօր հանրապետությունում իրավիճակ փոխելու համար:
Խմբակցության ղեկավարը համոզմունք հայտնեց՝ որևէ քաղաքական ուժ միայնակ ոչինչ չի կարող անել: Հարցին՝ ինչպես են պատրաստվում Կառավարության փոփոխության հասնել այն դեպքում, երբ մեծամասնությունն է դարձյալ ձևավորելու Կառավարություն:
«Հասկանալի է, որ ձևական կողմը պետք է դուրս գա, որովհետև այնքանով, որքանով ընկալվում է մեծամասնություն, այն չի արտահայտում իրական պատկերը, որ իրապես քաղաքական մեծամասնություն է հասարակության համար: Կառավարության հրաժարականն ինքնանպատակ կլինի, եթե ռեալ, համոզիչ այլընտրանք չներկայացվի: Ձևական մասը պետք է դուրս գա, մենք, բնականաբար, ծրագիր ենք մշակում և աշխատում ենք պլատֆորմի վրա, որը երկու բաղադրիչ ունի՝ քաղաքական ու տնտեսական»,- ասաց նա՝ հավելելով, որ կան ուժեր, որոնք տակտիկական խնդիրներից ելնելով՝ գտնում են, որ փուլ առ փուլ պետք է գնալ իշխանափոխության, իսկ այն, որ իշխանությունը համառում է, փորձում խոչընդոտել, մեկ բացատրություն ունի՝ իշխանությունը շատ լավ հասկանում է, թե դա առաջին քայլերից մեկն է, որին պետք է հաջորդի ամբողջական իշխանությունը:
Լուսանկարը` PanARMENIAN Photo-ի
