ԵՄ-ի կողմից Ուկրաինային խոստացված Ասոցացման համաձայնագրի քաղաքական մասի ստորագրումը բախվել է դժվարությունների: Այս մասին ասվում է հոդվածում, որը հրապարակել է բրիտանական Financial Times-ը:
Ինչպես նշվում է հրապարակման մեջ, եվրոպացի առաջնորդները շատերին զարմացրին, երբ անցած շաբաթ որոշեցին արդեն մոտ ժամանակներս ստորագրություններով ամրագրել համաձայնագրի քաղաքական մասը՝ շրջանակներից դուրս թողնելով առևտրին վերաբերող մասերը: Ինչպես ընդգծվում է հոդվածում, դա տեղի է ունեցել՝ չնայած այն բանին, որ Եվրահանձնաժողովի պաշտոնական անձինք ավելի վաղ հասկացնել էին տվել, որ կսպասեն մայիսին կայանալիք ընտրությունների արդյունքներով Կիևում լեգիտիմ կառավարության ընտրմանը:
«Դիվանագետների տեղեկություններով՝ չորեքշաբթի ԵՄ դեսպանների հանդիպմանը Եվրահանձնաժողովի իրավաբանները հայտարարել են, որ չեն կարողանում հասկանալ, թե ինչպես կարելի է ստորագրել քաղաքական մասը առանց ողջ համաձայնագրի շուրջ կրկնակի բանակցությունների անցկացման»,- ասվում է հոդվածում:
Financial Times-ի տվյալներով՝ նման կրկնակի համաձայնեցումները շաբաթներ կամ ամիսներ կտևեն, ինչը կխախտի մոտ ժամանակներս քաղաքական մասը ստորագրելու ԵՄ գագաթնաժողովի որոշման ոգին: Դա իրավականորեն անելն անհնար է՝ չնայած այն բանին, որ ներկայիս ծրագրի իմաստն այն է, որ համաձայնագրի քաղաքական մասը ստորագրվի հինգշաբթի կայանալիք ԵՄ հերթական գագաթնաժողովին՝ նշում են հրապարակման հեղինակները:
Վերջնարդյունքում դիվանագետները իրավաբաններին խնդրել են բարեփոխված ծրագիր առաջարկել երկուշաբթի, երբ Բրյուսելում կհանդիպեն ԵՄ երկրների արտգործնախարարները:
