Արտաքին գործերի նախարար Էդվարդ Նալբանդյանը այսօր մեկնելու է Ֆրանսիա, որտեղ կհանդիպի Ֆրանսիայի արտգործնախարար Լորան Ֆաբիուսի հետ: Թե ինչ օրակարգով է տեղի ունենալու հանդիպումը, ինչ հարցեր են քննարկվելու` չի մանրամասնվում: Ամենայն հավանականությամբ Ֆաբիուսի հետ հանդիպմանը կքննարկվի Լեռնային Ղարաբաղի հակամարտության կարգավորման գործընթացը` նկատի ունենալով այն, որ այս օրերին կարգավորման գործընթացի շուրջ տեղի են ունենում ինտենսիվ հանդիպումներ:
ԵԱՀԿ Մինսկի խմբի համանախագահները, որոնց շարքում է նաև Ֆրանսիայի ներկայացուցիչը, մի քանի օր առաջ Փարիզում հանդիպում ունեցան Նալբանդյանի հետ, հետո Փարիզում եղավ նրանց հանդիպումը Մամեդյարովի հետ, իսկ նախօրեին էլ հանդիպում տեղի ունեցավ Նալբանդյանի հետ՝ արդեն Մոսկվայում: Ընդ որում` Մինսկի խմբի ամերիկացի համանախագահ Ուորլիքը «Թվիթերում» նաև հայտնել էր, որ լինելու է նաև հանդիպում ռուսական կողմի հետ: Այսպիսով, ակնհայտ է, որ ղարաբաղյան հակամարտության կարգավորման գործընթացում ինտենսիվ բանակցությունների մի ժամանակաշրջան է, որը հատկապես հետաքրքրական է դառնում Ղրիմի շուրջ ծավալվող իրադարձությունների ֆոնին, որում լարվում են Արևմուտք-Ռուսաստան հարաբերությունները:
Ահա այս տեսանկյունից շատերն են հարցադրում անում, թե այդ լարումը ինչպես կանդրադառնա Մինսկի խմբում Արևմուտքի և Ռուսաստանի հարաբերությունների վրա, նրանց աշխատանքի վրա: Առայժմ կարծեք թե որևէ արտառոց գործընթացներ չկան` բացառությամբ, իհարկե, առկա ինտենսիվությունից, ինչպես նաև ամերիկացի համանախագահի հայտարարությունից՝ կրկին «Թվիթերում», թե հույս ունեն այս ամիս կազմակերպել Սարգսյան-Ալիև հանդիպում: Սա է հետաքրքրական, թե ինչու է առաջացել նման անհրաժեշտություն, քանի որ կարծեք թե նման հանդիպման մասին մինչ այս չէր ազդարարվել, ավելին` նախագահական մակարդակով հանդիպումների կազմակերպումը Մինսկի խումբը, որպես կանոն, սկսում էր դեռ ամիսներ առաջ այդ մասին հայտարարելով:
Այսպիսով, որոշակի աժիոտաժ կարգավորման գործընթացում ակնհայտ է: Մնում է միայն հասկանալ, թե ինչով է պայմանավորված այս աժիոտաժը՝ դրա հիմքում Արևմուտք-Ռուսաստան հարաբերությունների լարվածության տարածո՞ւմն է նաև Մինսկի խմբի աշխատանքների և ղարաբաղյան հակամարտության վրա, թե՞ հակառակը՝ կողմերը փորձում են այս ուղղությամբ պայմանավորվել չտարածել այդ լարվածությունը և չթեժացնել ղարաբաղյան խնդիրը, քանի որ այս դեպքում պատերազմից խուսափելն այլևս շատ ավելի բարդ կլինի, առավել բարդ, քան նույնիսկ բուն Ուկրաինայում, Ղրիմում:
Աժիոտաժի այս կամ այն հիմքերի մասին ենթադրությունների համար, սակայն, հրապարակային տեղեկությունները բավարար չեն, և դժվար է գալ որևէ եզրակացության, համենայնդեպս` առայժմ: Բայց, ըստ ամենայնի, երկար սպասելու հարկ չի լինի, և առաջիկայում անպայմանորեն ի հայտ կգան իրողություններ, որոնք թույլ կտան հասկանալ աժիոտաժի պատճառները:
