«Իհարկե Կաթողիկոսի այցն արագացրեց այդ որոշման ընդունումը, սակայն ես համաձայն չեմ, որ դա միայն կապված է Կաթողիկոսի այցի հետ, իմ կարծիքով՝ այստեղ առավել մեծ է կաթոլիկ եկեղեցու և Հռոմի, ինչպես նաև միջազգային հանրության դերակատարությունը»,- «Առաջին լրատվականի» հետ զրույցում, անդրադառնալով վրացական խորհրդարանի ընդունած օրենսդրական փոփոխություններին, որոնցով նախատեսվում է իրավաբանական անձի կարգավիճակ շնորհել երկրում գործող կրոնական միություններին, այդ թվում՝ Հայ Առաքելական եկեղեցուն, նշեց Թբիլիսիի հայերի ասամբլեայի ղեկավար Առնոլդ Ստեփանյանը:
Նա նշեց, որ թեև վրացական կողմը Հայաստանից պահանջում է նման կարգավիճակ տալ նաև Հայաստանում գործող վրացական եկեղեցիներին, սակայն դա այդքան էլ հիմնավոր չէ, քանզի կրոնների մասին ՀՀ օրենքում սկզբունքորեն կրոնական խմբավորումները որևէ խնդիր չունեն և կարող են շատ հեշտ ստանալ գրանցում.
«Հայաստանի օրենքը նման ազատություն տալիս է տարբեր դավանանքի ներկայացուցիչներին, իսկ Վրաստանում առաջնահերթությունը տրված էր միայն վրաց ուղղափառ եկեղեցուն՝ համաձայն համապատասխան Կոնդակի, որն արդեն հնացած էր»:
Առնոլդ Ստեփանյանը նշեց, որ Վրաստանի խորհրդարանի այս որոշումը չի հավասարեցնում Վրաստանում գործող բոլոր եկեղեցիներն ու կրոնական կազմակերպությունները, սակայն դա հնարավորություն է տալիս, թե՛ հայկական եկեղեցուն, թե՛ մյուսներին գործել իրավական դաշտում:
Խոսելով որոշումից հետո Վրաստանում հնչող քննադատական հայտարարությունների և բողոքների մասին՝ Ստեփանյանը նկատեց, որ Վրաստանում տիրում է հակահայկական հիստերիա, և փորձում են այժմ այնպես ներկայացնել, կարծես հայերն են մեղավոր այս որոշման համար.
«Դժգոհություն կա, որ հայերը հասան նրան, որ ոչ միայն հայկական եկեղեցուն տրվեց իրավաբանական կարգավիճակ, այլ նաև տարաբնույթ սեկտաներին, որոնց դեմ է վրաց հասարակությունը»:
