Մեծ Բրիտանիան կարող է դադարեցնել Ռուսաստանի հետ համագործակցությունը՝ Ուկրաինայում ստեղծված իրավիճակի պատճառով: Բրիտանական կառավարությունը չեղյալ է հայտարարում նախարարների մակարդակով Մոսկվայի հետ մի շարք պայմանագրեր: Այս մասին գրում է Ria Novosti-ն՝ հղում անելով վարչապետ Դևիդ Քեմերոնին:
«Ես կարգադրել եմ անհապաղ ուսումնասիրել Ռուսաստանի հետ կառավարական մակարդակով բոլոր հարաբերությունները: Մենք արդեն հայտարարել ենք, որ կառավարության ներկայացուցիչները և արքայական ընտանիքի անդամները չեն մեկնի Սոչի՝ Պարալիմպիական խաղերին: Բազմաթիվ այլ՝ նախարարական մակարդակով ծրագրված հանդիպումներ չեղյալ կհայտարարվեն ընթացիկ իրավիճակի պատճառով»,- ասել է Քեմերոնը:
«Ուսումնասիրում եմ ՌԴ-ի հետ ռազմական ոլորտում երկկողմ հարաբերությունները: Դրանք կարող են սառեցվել՝ բացառությամբ այն կապերի, որոնք պահանջվում են միջազգային համաձայնագրերի իրականացման համար, մասնավորապես՝ Եվրոպայում զինված ուժերի վերահսկողության վերաբերյալ»,- նշել է վարչապետը:
Նրա խոսքով՝ ինքը բրիտանական կառավարության անդամներին կարգադրել է տեղեկություններ հավաքել և իրեն տրամադրել Ռուսաստան զենքի արտահանման վերաբերյալ:
