Սփյուռքի նախարար Հրանուշ Հակոբյանն աշխատանքային այցով մեկնել էր Պորտուգալիա և Իսպանիա։
Լիսաբոնում նախարարը հանդիպումներ է ունեցել «Գալուստ Կյուլպենկյան» հիմնարկության նախագահ Արթուր Սանթոս Սիլվայի, հիմնարկության հոգաբարձու, Գալուստ Գյուլբենկյանի ծոռ Մարտին Եսայանի, հայկական համայնքների բաժանմունքի ղեկավար, դոկտոր Ռազմիկ Փանոսյանի և Պորտուգալիայի հայ համայնքի ներկայացուցիչների հետ:
Հանդիպումներին քննարկվել են Գալուստ Գյուլբենկյանի 150-ամյակին նվիրված միջոցառումների, «Գալուստ Կյուլպենկյան» հիմնարկության հայկական բաժանմունքների հետ Սփյուռքում և ՀՀ-ում կրթական, մշակութային, հետազոտական համատեղ ծրագրեր իրականացնելու, սիրիահայ ուսանողներին կրթաթոշակ տրամադրելու, երիտասարդ գիտնականների աջակցությանը վերաբերող հարցեր:
Հրանուշ Հակոբյանն իր գոհունակությունն է հայտնել 2014-2017 թթ. «Գալուստ Կյուլպենկյան» հիմնարկության հայկական համայնքների բաժանմունքների ծրագրերի առնչությամբ՝ նշելով, որ դրանք Հայրենիք-Սփյուռք գործակցությանը, արևմտահայերենի պահպանմանը և հայապահպանությանը միտված լավագույն քայլեր են: «Գալուստ Կյուլպենկյան» հիմնարկության հայկական համայնքների բաժանմունքի 2014 թ. աշխատանքներում, բացի վերը նշված ծրագրերից, նախատեսվում է նաև աջակցություն ցուցաբերել ՀՀ-ում քաղաքացիական հասարակության ձևավորմանը՝ ընդհանուր առմամբ հայաստանյան ծրագրերին տրամադրելով շուրջ 800 հազար ԱՄՆ դոլար:
Նախարարը այցելել է նաև «Գալուստ Կյուլպենկյանի» անվան թանգարան, ծանոթացել մեծ բարերարի հարուստ հավաքածուին, որտեղ տեղ են գտել արվեստի և մշակույթի արժեքավոր գործեր, մասնակցել է «Գալուստ Կյուլպենկյանի» անվան սիմֆոնիկ նվագախմբի համերգին, որի կազմում ընդգրկված են նաև երեք երիտասարդ երաժիշտ Հայաստանից:
ՀՀ սփյուռքի նախարարը ՀՀ վարչապետի անունից Հայաստան է հրավիրել «Գալուստ Կյուլպենկյան» հիմնարկության նախագահ Արթուր Սանթոս Սիլվային, որն էլ սիրով ընդունել է հրավերը:
Հաջորդ օրը ՀՀ սփյուռքի նախարարն այցելել է Իսպանիայի Բարսելոն քաղաք, որտեղ հանդիպումներ է ունեցել Հայաստանյայց Առաքելական սուրբ եկեղեցու Հայրապետական պատվիրակ, Իսպանիայի և Պորտուգալիայի ընդհանուր փոխանորդ Տ. Սասուն Ծ. Վրդ. Զմրուխտյանի, Բարսելոնի հայկական մշակութային միության նախագահ Սևադա Սահակյանի և հայ համայնքի այլ ներկայացուցիչների հետ:
Նախարարը ծանոթացել է Բարսելոնի մեկօրյա վարժարանի աշխատանքներին, հանդիպել վարժարանի սաներին, ուսուցիչներին և տնօրինությանը: Հանդիպման ժամանակ Հրանուշ Հակոբյանը շնորհակալություն է հայտնել ուսուցիչներին իրենց նվիրումի և ազգապահպան գործի համար, ինչպես նաև իր մաղթանքներն է հղել Բարսելոնի հայկական մշակութային միությանը: Պայմանավորվածություն է ձեռք բերվել Բարսելոնի հայկական մշակութային միության և ՀՀ սփյուռքի նախարարության հետ համատեղ ծրագրեր իրականացնելու հարցում: Նախարարը պատրաստակամություն է հայտնել աջակցել ապրիլի 18-19-ը Բարսելոն քաղաքում կազմակերպվող «Եվրոպայի համահայկական 20-րդ խաղերին»:
Հայ համայնքի ներկայացուցիչների հետ հանդիպման ժամանակ ՀՀ սփյուռքի նախարարը ներկայացրել է 5-ամյակում իրականացրած հիմնական ծրագրերը, խոսել 2014 թվականին իրականացվելիք ծրագրերի մասին:
