Իրաքի վարչապետ Ադել Աբդել Մահդին մայիսի 21-ին հայտարարել է, որ իր երկիրը մտադիր է պատվիրակություններ ուղարկել Իրան և ԱՄՆ՝ թուլացնելու այդ երկու պետությունների միջև առաջացած լարվածությունը: Վարչապետի խոսքը մեջբերել է Al Sumaria հեռուստաալիքը:
«Մենք պատվիրակություններ կուղարկենք Թեհրան և Վաշինգտոն, որպեսզի վերջ դնենք նրանց միջև լարվածությանը,-ասել է Մահդին:-Ամերիկացի և իրանցի պաշտոնատարները հավաստիացրել են մեզ, որ պարերազմ չեն ցանկանում»: Նա նշել է, որ Իրաքն արդեն Վաշինգտոնի և Թեհրանի միջև որպես միջնորդ է հանդես գալիս՝ փորձելով լուծել կողմերի միջև առկա ճգնաժամը:
Վարչապետը հավելել է, որ ճգնաժամի կարգավորման սցենարների հարցում Բաղդադի դիրքորոշումը «շատ մոտ է եվրոպականին»:
Եվրոպայի երկրները կոչ են անում Վաշինգտոնին և Թեհրանին՝ ցուցաբերել զսպվածություն և գոյություն ունեցող տարաձայնությունները լուծել դիվանագիտական ճանապարհով՝ հաղորդել է TASS-ը: