Լուրեր
Քոչարյանը այնքան հանցագործություն է կատարել, որ իշխանություն հանձնելը նրա համար մահացու վտանգ էր
  • 12:30
  • 2019-05-16
  • Դիտումներ՝ *

«Ռոբերտ Քոչարյանն արյունով եկավ, արյունով գնաց, նրա իշխանավարման տարիներին ցանկացած ընդդիմադիր քայլ շատ լուրջ հակահարված էր ստանում՝ ոչ միայն խոսքով, այլ նաև գործողությամբ, որի արդյունքում լինում էին նաև սպանություններ: Քոչարյանի օրորք դաժան դեպքեր են եղել, և առանցքում ինքն է եղել,- «Առաջին լրատվական»-ի հետ զրույցում այս մասին ասաց ԱԺ նախկին պատգամավոր Անահիտ Բախշյանը: – Քոչարյանն այսօր ասում է, թե տեղյակ չէ այդ ամենից, և նրա փաստաբանն էլ տարօրինակ ձևով համարձակվում է ասել, թե կապացուցի, որ Սահմանադրությամբ՝ բանակը կարելի է հանել ժողովրդի դեմ, սա արդեն վերջն է»:

ՀՀ Ժողովրդական կուսակցության փոխնախագահ Գրիգոր Հարությունյանը կարծիք հայտնեց, որ Քոչարյանն արդարադատության առջև միայն Մարտի 1-ի գործով չէ, որ պետք է պատասխան տա, սպասելի է, որ նոր մեղադրանքներ կառաջադրվեն: «Մինչև Մարտի 1-ը եղել է Հոկտեմբերի 27… Ռ. Քոչարյանն իշխանության է եկել՝ Սահմանադրությունը խախտելով, ոտքի տակ տալով, և մինչև վերջ Սահմանադրությունը ոտնահարել է, ժողովրդին ստորացրել, երկրում ստեղծել է քրեաօլիգարխիկ համակարգ, վատնել են պետության ողջ կապիտալը: Չմոռանանք, որ մինչև Ռ. Քոչարյանը, մեր երկրում սեփականաշնորհվել են միայն մինչև 35 աշխատող ունեցող ձեռնարկությունները, Քոչարյանի ժամանակ մեր ողջ պոտենցիալը ոչնչացվեց…»:

ՀԱԿ վարչության գործադիր քարտուղար Սամվել Աբրահամյանը, անդրադառնալով Ռ. Քոչարյանի որդու հարցադրմանը, թե նախագահի ինչին էր պետք մարդ սպանել, նշեց. «Հայաստանում ամեն մարդ գիտի, որ Քոչարյանը Սահմանադրությունը կեղծելով՝ իշխանությունը զավթել է, և իրեն պետք էր այդ զավթած իշխանությունը պահպանել, նա այնքան հանցագործություն է գործել, որ իշխանությունը կորցնելը նրա համար մահացու վտանգ էր, գիտեր, որ բանտում է հայտնվելու… Քոչարյանը Հայաստանի ցանկացած բնագավառ ղեկավարել է ոչ որպես նախագահ, ավերել է ցանկացած բնագավառ, նա ՀՀ նախագահ չի եղել, հայոց պետականության հետ ոչ մի կապ չի ունեցել»: Սամվել Աբրահամյանը նաև ընդգծեց, որ Քոչարյանը մեծագույն հանցանք է գործել թեկուզ միայն հենց նրանով, որ փոխել է 88թ. զարթոնքով մեր պետության համար բացված նոր ուղին և երկիրը տարել դեպի ֆեոդալական կարգեր, խանություններ:

Մանրամասն՝ տեսանյութում:

  • Դիտումներ՝ *