Ամերիկահայ գործարար Էդմոն Խուդյանի «Արին կապիտալ» ընկերությունը կանխամտածված սնանկացման հասցնելու մեջ մեղադրվող Վլադիսլավ Մանգասարյանը մեկ տարի կալանավորվելուց հետո այսօր ազատ է արձակվել: Նրա խափանման միջոց կալանքը փոխվել է և ընտրվել է ստորագրություն չհեռանալու մասին:
Նշենք, որ 1 տարի կալանքը թույլատրելի առավելագույն ժամկետն է նախաքննության ընթացքում անձին կալանքի տակ պահելու համար: Մեկ տարին լրանալուց հետո նախաքննական մարմինը կամ պետք է ազատ արձակի մեղադրյալին, կամ հայտարարի նախաքննության ավարտի մասին: Բայց այս աղմկահարույց գործով նախաքննությունը դեռևս շարունակվում է:
Էդմոն Խուդյանը վերջերս «Առաջին լրատվական»-ի հետ զրույցում ասել էր, որ իր համոզմամբ՝ նախաքննությունը դիտավորյալ է ձգձգվում:
«Մենք հույս ունենք, որ նրա մեկ տարին լրանալուց հետո նրան ազատ չեն արձակի, այլ գործը կուղարկեն դատարան: Բայց ես դեռ կարծում եմ, որ հովանավորչությունը շարունակվում է այն աստիճանի, որ հնարավոր է նաև նրան բաց թողնեն»,- ասել էր նա: