Հնդկաստանի առողջապահության նախարար Ղուլամ Նաբի Ազադի հայտարարությունը, թե «միասեռականությունը հիվանդություն է», հանգեցրել է միջազգային մակարդակի սկանդալի: Այս մասին հաղորդում է BBC-ն: Այս մեկնաբանությունը նախարարն արել էր երկուշաբթի, երբ քննարկվում էին ՁԻԱՀ-ի հետ կապված խնդիրները: Նա առաջարկել է «միասեռականությունը դիտարկել որպես հիվանդություն, որը ներմուծվել է այլ երկրներից»:
«Չնայած դա անբնական է, այդուհանդերձ այն գոյություն ունի և ներկա պահին շատ ակտիվ տարածվում է, որի պատճառով այն ավելի դժվար է հայտնաբերել»,- ասել էր նախարարը: Ավելի ուշ նա հայտարարել է, որ իր խոսքերը դուրս են բերվել ընդհանուր համատեքստից: Նա ասել է, որ ինքը խոսել է ՁԻԱՀ-ի, այլ ոչ թե միասեռականության մասին:
Սակայն նրա խոսքերն արագ տարածվել են աշխարհում, և առաջինն արձագանքել է ՄԱԿ-ի առողջապահության հարցերով զեկուցող Անանդ Հովերը, որն ասել է, որ նախարարի խոսքերն ափսոսանք են առաջացնում և անընդունելի են: Հնդկական ոչ կառավարական Naz հիմնադրամի նախագահ Անջանի Հոպալանը, որը զբաղվում է Հնդկաստանում ՁԻԱՀ-ի կանխարգելման խնդիրներով, ասել է, որ այդ նախարարն «ապրում է այլ մոլորակում»: «Այդպիսի մարդիկ իրավունք չունեն նման բարձր պաշտոն զբաղեցնելու»,- ասել է Հոպալանը:
Այժմ Ազադից սպասում են ներողություն, իսկ որոշ շրջանակներ նույնիսկ պահանջում են նրա հրաժարականը:
