Amazon-ի և Blue Origin-ի հիմնադիր Ջեֆ Բեզոսը Վաշինգթոնում կայացած շնորհանդեսին տիեզերական սարք է ներկայացրել, որը հնարավորություն կտա վայրէջք կատարել Լուսնի վրա, հաղորդում է ABC հեռուստաալիքը:
«Ժամանակն է վերադառնալ Լուսին, այս անգամ՝ մնալու պայմանով»,- ասել է նա լրագրողների և տիեզերական ոլորտի աշխատողների համար կազմակերպված փակ ցուցադրության ժամանակ:
Այդ պահին բեմում, Բեզոսի ետևում, ցուցադրվել է նրա ընկերության կողմից նախագծվող դեպի Լուսին ճանապարհորդելու համար նախատեսված Blue Moon տիեզերական սարքի իրական չափերով մակետը:
Նրա խոսքերով, մոդուլի մշակումը տևել է երեք տարի, այն կկարողանա փափուկ վայրէջք կատարել Լուսնի մակերևույթի վրա և միաժամանակ 3.6-ից մինչև 6.5 տոննա օգտակար բեռ տեղափոխել տիեզերք: Բացի դրանից, սարքի տանիքին հնարավոր է լուսնագնաց տեղավորել, սակայն ավելի մանրամասն դա չի նկարագրվել:
Սարքում կտեղադրվի հատուկ նախագծված BE-7 շարժիչ, որի առաջին փորձարկումները պետք է տեղի ունենան միայն այս տարվա ամռանը: