«Վաղարշ և որդիներ» կոնցեռնի մի շարք աշխատակիցներ այսօր զանգահարել էին «Առաջին լրատական»-ի խմբագրություն և բողոքում էին, որ վերջին օրերին կոնցեռնի նախագահ Վաղարշ Աբրահամյանը 50-100 տոկոսով թանկացրել է թանկարժեք քարի արտադրամասերի ու մի շարք այլ տաղավարների վարձակալության գումարները: Նվազագույնը 50 հազար դրամ արժեցող տաղավարները դարձել են 100 հազար դրամ:
Ոսկու շուկայի աշխատակիցները տաղավարների թանկացումը կապում էին վերջերս «Վաղարշ և որդիներ» կոնցեռնի նկատմամբ Էկոնոմիկայի նախարարության շուկայի վերահսկողության տեսչության կողմից կիրառված 65 միլիոն դրամ տուգանքի հետ: Ըստ խմբագրություն զանգահարած աշխատակիցների` թանկացումները սկսվել են փետրվարի 1-ով և տաղավարների մեծ մասի վարձակալների հետ արդեն իսկ կնքվել են նոր, բարձրացված գնով պայմանագրեր:
«Պայմանագրերը մարտի 1-ով կնքվել են: Մարդիկ էլ ստիպված համաձայնել են, քանի որ էդ տաղավարների վրա գումարներ են ծախսել, սարքել են: Բայց էդպես ոնց կլինի, մենք հո ստիպված չենք իրա փոխարեն պատասխան տանք»,- բողոքեց աշխատողներից մեկը՝ չցանկանալով, որ իր անունը հրապարակվի: Նրա խոսքով` իրենք խոսել են Վաղարշ Աբրահամյանի հետ, նա էլ ասել է, թե դա է իր պայմանները, ով ուզում է թող մնա, իսկ ում ձեռք չի տալիս, թող թողնի գնա:
«Մեզ ասեց` տեսնում եք չէ՞, ինձ ոնց են նեղում, տակից չեմ կարողանում դուրս գալ, էս ա իմ պայմանները: Բայց մենք ինչ մեղավոր ենք, հասկանում ենք, որ իրենից էլ են շատ տանում, բայց տարածը վերականգնելը մեր պարտականությունը չի: Ոնց երևում է կառավարության հարվածները վերջում դուրս են գալիս ժողովրդի ջանից»,- ասաց նա:
Երբ այցելեցինք ոսկու շուկա հասկանալու թանկացումների պատճառը, Վաղարշ Աբրահամյանը չցանկացավ ընդունել մեզ: Ասացին` վատ է զգում իրեն, ճնշումը բարձրացել է: Իսկ նրա կինը՝ Նունե Նալբանդյանը, ով «Վաղարշ և որդիներ» ՍՊԸ-ի տնօրենն է, հայտարարեց, որ իրենց մոտ ոչ մի թանկացում չկա, ամեն ինչ կարգին է, և իրենք աշխատում են նախկինի պես՝ բնականոն հունով: Տիկինը հրաժարվեց ցույց տալ որևէ փաստաթուղթ, պայմանագիր, որը կփաստեր, որ վարձավճարների թանկացում, վերանայում չի եղել:
Մենք փորձեցինք տեղում աշխատակիցներից պարզել՝ թանկացումներ եղել են, թե ոչ, սակայն նրանցից ոչ մեկը տեսախցիկի առաջ չխոսեց թանկացումների մասին: Իսկ մի քանի հաղթանդամ տղամարդիկ տեսնելով թե մենք ինչ հարցով ենք դիմում տաղավարների վարձակալներին՝ մեզ դուրս հրավիրեցին ոսկու շուկայից՝ ասելով թե մենք խուճապ ենք առաջացնում աշխատակիցների մոտ:
Հիշեցնենք, որ «Վաղարշ և որդիներ» կոնցեռնը 65 միլիոն դրամով տուգանվեց թանկարժեք իրերը պատշաճ կարգով չհարգադրոշմելու և չդրոշմակնքելու համար: Ընկերությունը, սակայն, այս պահին դատարանում վիճարկում է շուկայի վերահսկողության տեսչության տուգանքի որոշումը:
