Ճապոնիայի Ակիհիտո կայսրը հրաժեշտի և երախտագիտության ուղերձ է հղել ազգին: Գահից Ակիհիտո կայսեր հրաժարման արարողությունն ընթանում է Տոկիոյում՝ «Սեյդեն Մացու-նո-մա» կայսերական պալատի դահլիճում: Երկրի բոլոր հեռուստաալիքներն ուղիղ հեռարձակում են իրականացնում պալատից:
«Այսօր ես՝ որպես կայսր, ավարտում եմ իմ ծառայությունը: Շնորհակալ եմ ժողովրդին այն խոսքերի համար, որոնք նրա անունից հնչեցրեց վարչապետ Սինձո Աբեն: Ես երջանիկ եմ, որ իմ գահակալման պահից ի վեր 30 տարի վայելել եմ ժողովրդի վստահությունն ու հարգանքը: Աղոթում եմ, որ կառավարման Ռեյվա նոր դարաշրջանը, որն սկսվում է վաղվանից, լինի խաղաղ ու արգասաբեր: Ես աղոթում եմ մեր երկրի և ամբողջ աշխարհի մարդկանց երջանկության համար»,-ասել է կայսրը:
Ակիհիտո կայսեր ու նրա տիկնոջ հետ միասին արարողությանը մասնակցում են գահաժառանգ Նարուհիտոն՝ տիկնոջ հետ, կայսրական ընտանիքի անդամները, ինչպես նաև վարչապետը, իշխանության երեք թևերի ներկայացուցիչները՝ ընդամենը շուրջ 300 մարդ:
Ավելի վաղ վարչապետ Սինձո Աբեն ընթերցել է տեքստ և պաշտոնապես հայտարարել գահից կայսեր հրաժարման մասին, ինչպես նաև ճապոնական ժողովրդի անունից երախտագիտություն է հայտնել հեռացող միապետին, հաղորդել է ՌԻԱ Նովոստին:
