Իշխանական վերնախավում պարզել են, որ Կուտակային կենսաթոշակային համակարգի դեմ պայքարում են նաև որոշ բարձրաստիճան պաշտոնյաներ, ովքեր իրենց համակարգման ներքո ունեն մեծաթիվ աշխատողներ: Խոսքը վերաբերում է հատկապես նախարարներին:
«Առաջին լրատվական»-ի տեղեկություններով՝ այս առումով առաջինն ուշադրության արժանացել է տրանսպորտի և կապի նախարար Գագիկ Բեգլարյանը:
Հիշեցնենք, որ կառավարության վերջին նիստերից մեկից հետո Գ. Բեգլարյանը՝ պատասխանելով լրագրողների հարցին, թե իր ղեկավարած գերատեսչությունում կուտակային կենսաթոշակային պահումներ արվե՞լ են, այսպես էր պատասխանել. «Ովքեր չեն համաձայնել վճարել, նրանցից չի պահվել»:
Այս դեպքում խոսքը միայն Գ. Բեգլարյանի ղեկավարած ՏԿ նախարարությանը չի վերաբերում: Հիշեցնենք, որ կուտակային կենսաթոշակային համակարգին դեմ էին հատկապես կապի և տրանսպորտի ոլորտների ընկերությունները, որոնք թեև անկախ մասնավոր ընկերություններ են, բայց որոշակի առումով գտնվում են այդ նախարարության համակարգման շրջանակներում: Վերջին ամիսներին բողոքի ակցիաներին միանում էին «ՎիվաՍելլ», «ԱրմենՏել», «Հարավկովկասյան երկաթուղի» ընկերությունների աշխատակիցները: Այս ընկերությունները որոշակի առումներով պատասխանատու են ՏԿ նախարարությանը, և մեր տեղեկություններով՝ իշխանությունները պարզել են, որ այդ դժգոհություններում իր լուման ունի նաև Գ. Բեգլարյանը:
Իշխանական վերնախավում կուտակային կենսաթոշակային համակարգի նկատմամբ ՏԿ նախարարի այս վերաբերմունքը պայմանավորում են ներիշխանական կոնֆլիկտների համատեքստում:
Բանն այնն է, որ Գ. Բեգլարյանը պատկանում է այն պաշտոնյաների թվին, ովքեր թեև բարձր պաշտոն են զբաղեցնում, բայց դժգոհ են ազդեցության ավելի մեծ լծակ չունենալու կամ նախկինի համեմատ՝ քիչ ունենալու պատճառով:
Ինչպես գիտենք, Գ. Բեգլարյանը նախկինում Երևանի քաղաքապետն էր, նա զբաղեցրել ընտրովի պաշտոն և ձեռք է բերել Հայաստանի ընտրողների ավելի քան կեսի ձայները: Այդ առումով նա իրեն համարել է նախագահից հետո երկրորդ մարդը, ավելին՝ ավելի լեգիտիմ ընտրված քաղաքապետ, և այդ մասին նույնիսկ բարձրաձայնել է որոշակի շրջանակներում: Իսկ իր հայտնի պաշտոնանկությունից ու ՏԿ նախարար նշանակվելուց հետո նա դժգոհ է նոր՝ ավելի սահմանափակ հնարավորություններ ընձեռող այդ պաշտոնից: Եվ այժմ հավանաբար փոփոխությունների ու ավելի մեծ հնարավորություններ ունենալու ակնկալիքով անուղղակիորեն իր լուման է ներդնում հասարակական դժգոհություններում:
Միգուցե Գ. Բեգլարյանն ուղղակիորեն չի հրահրում, որ վերը նշված ընկերությունների աշխատակիցները մասնակցեն կուտակային կենսաթոշակային համակարգի դեմ անցկացվող ակցիաներին, բայց չի էլ փորձում դրանք կանխել: Իսկ դա, գործող իշխանությունների տրամաբանությամբ, համարվում է իրենց դեմ ուղղված քայլ:
Մեր տեղեկություններով՝ նախագահականում այդ մասին հասկացրել են Գ. Բեգլարյանին ու նախազգուշացրել զերծ մնալ նման ստվերային գործունեությունից:
Լուսանկարը՝ Bravo.am-ի
