«Առ այսօր Մանթաշյանցի կերպարը մեզ համար եղել է անգերազանցելի և օրինակելի: Մանթաշյանցը մարդ էր, որի բարոյական կերպարը կարիք ունի տիրաժավորվելու և կրկնվելու հայ գործարարության մոտ: Մանթաշովի կերպարի վերհանումը կարևոր է նրանով, որ նոր կապիտալիզմ կառուցող հայ իրականության մեջ այսօրվա գործարարները փորձեն նմանվել նրան, որպեսզի լինեն սոցիալապես պատասխանատու, և որպեսզի հասարակությունը նրանց ընդունի»,- այսօր Ալեքսանդր Մանթաշյանցի ծննդյան օրը Մանթաշյանցի արձանի մոտ լրագրողների հետ զրույցում ասաց Հայաստանի արդյունաբերողների և գործարարների միության նախագահ Արսեն Ղազարյանը:
Միությունն արդեն երկրորդ տարին է՝ ծաղկեպսակ է դնում Մանթաշյանցի արձանի մոտ և հիշում հայ մեծ բարերարին:
«Առաջին լրատվականը» Ղազարյանից հետաքրքրվեց՝ այսօրվա գործարարների, օլիգարխների մեջ տեսնո՞ւմ է Մանթաշով բարերարի ոգին: Ըստ Ղազարյանի, սակայն, Հայաստանում օլիգարխ չկա, իսկ բարերարներ՝ շատ-շատ:
«Ես չեմ սիրում օլիգարխ բառը: Հայաստանը չունի այն ռեսուրսները, որի հիման վրա կձևավորվեին այսօրվա մեր պատկերացրած օլիգարխները: Մենք ունենք խոշոր հարկատուներ, շուկայում գերակա դիրք ունեցողներ և խոշոր աշխատատեղեր ստեղծողներ: Այո, մենք և միությունում, և միությունից դուրս ունենք նորօրյա Մանթաշովներ»,- ասաց Ղազարյանը:
Նշենք, որ Մանթաշյանցի արձանի մոտ շատ քիչ գործարար կար՝ արդյունաբերողների միությունից մի քանի մարդ և Արա Աբրահամյանի եղբայրը՝ գործարար Գագիկ Աբրահամյանը:
Մանթաշովի կերպարը գործարար աշխարհում կայանալու տարիներին օրինակ է եղել նաև վերջինիս համար: Աբրահամյանի խոսքով՝ այսօրվա գործարար աշխարհում Մանթաշովի պես բարերարներ շատ կան, բայց հրաժարվեց անուններ տալ: Իսկ երբ փորձեցինք կոնկրետ օրինակներով խոսել, Աբրահամյանն ասաց, որ օլիգարխների մասին խոսելը արդեն քաղաքականության դաշտից է, իսկ ինքը պատրաստ չէ քաղաքական հարցերի պատասխանել:
Գագիկ Աբրահամյանը հերքեց նաև օրերս մամուլում հրապարակված այն տեղեկությունը, որ ինքը առաջիկայում նշանակվելու է էներգետիկայի և բնական պաշարների նախարար և հրաժարվեց պատասխանել որևէ այլ հարցի:
