«Առաջին լրատվական»-ի զրուցակիցն է «Սասնա ծռեր» կուսակցության քարտուղարության համակարգող Վարուժան Ավետիսյանը։
– Պարոն Ավետիսյան, ի՞նչ կարծիք ունեք Դավիթ Սանասարյանի շուրջ տեղի ունեցող զարգացումների մասին։ Ճանաչելով Սանասարյանին՝ ի՞նչ եզրահանգման եք գալիս։
– Մենք պաշտոնական հայտարարությամբ ներկայացրել ենք մեր տեսակետը։ Կրեմլակենտրոն նորգաղութային համակարգը, որ կախյալության մեջ է պահում մեր երկիրը, համարում է, որ հաղթահարել է հեղափոխության ալիքը և արդեն կարող է վերահաստատել իր դիրքերը։ Այդ համակարգին կարող ենք նաև խորքային պետություն անվանել։ Խորքային պետություն, որ մեր ազգային շահերի հաշվին ծառայում է Կրեմլին։ Դավիթ Սանասարյանին քրեական հետապնդման ենթարկելը ռևանշի այդ նոր փուլի սկիզբն է։
– Արդյոք սա վկայությունն է այն բանի, որ իշխանության ներսում սկսել են ճաքեր առաջանալ, ինչո՞ւ, ըստ Ձեզ, թիրախ ընտրվեց Դավիթ Սանասարյանը։
– Իշխանությունն օր առաջ պետք է ընդգծի կրեմլակենտրոն նորգաղութային համակարգի՝ այդ խորքային պետության հետ իր տարբերությունը, խորացնի ու լայնացնի նրա հետ ունեցած ճեղքվածքը, տարանջատվի նրանից և պատասխանատվության ենթարկի նրան։ Այդ գործընթացը պետք է ներառի նախորդ ռեժիմի իրավաքաղաքական գնահատականը, համապարփակ և ամբողջական անցումային արդարադատությունը, որի առաջ պետք է կանգնեն իշխանությունը յուրացրած, պետությունը զավթած և այն իրենց հանցագործությունների գործիքի վերածած հանցավոր համագործակցության պարագլուխները, ինչպես նաև քաղաքական, տնտեսական և գործակալական լյուստրացիան։ Մինչ այդ, և դա ապահովելու նպատակով առնվազն պետք է վերակազմակերպվի կրեմլակենտրոն նորգաղութային համակարգի կամ խորքային պետության միջնաբերդը՝ հակահայ և հակամարդ տխրահռչակ կգբի հետնորդ ու մնացորդ ԱԱԾ-ն։ Մինչ անվտանգության մարմինների ազգային համակարգի ձևավորումը, ԱԱԾ-ի գործառույթներն ու կառույցները պետք է ըստ ոլորտային պատկանելության փոխանցվեն պաշտպանության նախարարությանը, ոստիկանությանը և այլ պետական մարմիններին։ Զուգահեռաբար՝ զբաղեցրած պաշտոններից պետք է ազատվեն ԱԱԾ-ի տնօրենը, նրա տեղակալները, ԱԱԾ-ի բարձրագույն և գլխավոր պաշտոններ զբաղեցնող պաշտոնատար անձինք։ Ընդ որում՝ այս քայլերի կատարման համար անհրաժեշտ օրենսդրական փոփոխությունները պետք է կատարվեն մեկ փաթեթով և անհապաղ։ Առնվազն այսքանն էր ենթադրում անցյալ տարվա ապրիլմայիսյան հեղափոխության մանդատը, որի պահանջը չկատարելը կհանգեցնի հեղափոխության ձախողման, և մեզ կկանգնեցնի ազգային աղետի առաջ։ Ցավոք սրտի, մինչ օրս Նիկոլ Փաշինյանը և նրա թիմակիցները խուսափել են լսել աղաղակող իրականությունը տեսնելու և այն փոխելու վերաբերյալ մեր և այլոց առաջարկությունները։ Ինչ վերաբերվում է Դավիթ Սանասարյանին թիրախ ընտրելուն, ապա դրա պատճառն այն է, որ նա չի ենթարկվում համակարգին և դիմադրում է նրան։
– Ուժային կառույցները նախարարություններ չդարձնելու իշխող ուժի պնդումներն ու պատճառաբանությունները որքանո՞վ են հիմնավոր։
– Առկա Սահմանադրությունը, առանց զսպումների և հակակշիռների, խանական միակուսակցական կառավարման համակարգի համար է ստեղծվել։ Ուժային մարմինների ենթակայության և վերահսկողության հարցերը հնարավոր է և հարկավոր է լուծել նոր Սահմանադրության ընդունմամբ։ Կիսատպռատությունը վտանգավոր և ոչ արդյունավետ է նաև այս հարցերի պարագայում։
– Չի՞ ստացվում արդյոք , որ տվյալ դեպքում իրավիճակի պատասխանատուն ոչ թե ԱԱԾ ղեկավար Արթուր Վանեցյանն է, այլ անձամբ վարչապետ Փաշինյանը, քանի որ ԱԱԾ–ն նրա վերահսկողության տակ գտնվող կառույց է։
-Նիկոլ Փաշինյանը պատասխանատու է օտարին ծառայող խորքային պետությունը չեզոքացնելու համար։ Դա հեղափոխության մանդատով նրան հանձնարարված առաջնային խնդիրն է։