Մեծ Բրիտանիայի բնակչուհին հին մատանու մեջ մազեր է գտել, որոնք կարող էին պատկանել անգլիացի գրող Շառլոտա Բրոնտեին՝ տեղեկացնում է The Guardian-ը։
Գտածոն ցուցադրվել է անտիկ արժեքների որոնման մասին Antiques Roadshow հեռուստահաղորդման ժամանակ։ Կինը պատմել է, որ նախկինում մատանին պատկանել է իր ամուսնու հանգուցյալ հորը։ Նա մատանու ներքին մասում փորագրություն է նկատել՝ գրողի անունը և մահվան ամսաթիվը։
«Հիմա, երբ այդ մասին մտածում եմ, մարմինս փշաքաղվում է։ Այնտեղ կա ծխնի և ներսում ինչ-որ մեկի հյուսված մազերը։ Իմ կարծիքով դա կարող է լինել Շառլոտա Բրոնտեի մազափունջը»,- ասել է կինը։
Մատանին ուսումնասիրել է ոսկերիչ Ջոֆրի Մանը։ Նրա խոսքով՝ ինքն իրենով մատանին արժե ոչ ավելի քան 25 ֆունտ ստեռլինգ, սակայն գրությունն ու մազերը արժեքը բարձրացնում են մինչև 20 հազար ֆունտ ստեռլինգ։