Հայ ազգային կոնգրեսը, հանուն ԼՂ հարցի շուրջ բանակցությունների, անընդհատ հրաժարվել է արմատական գործողություններից՝ իշխանությունների համար բանակցություններում ավելի հանգիստ գործելու հնարավորություն ստեղծելով: Այս անգամ, սակայն, ՀԱԿ-ը իշխանություններին մինչև սեպտեմբեր վերջնաժամկետ է տվել, և ԼՂ հարցում էլ Կազանից հետո հետաքրքիր զարգացումներ են սպասվում, մասնավորապես՝ այսօր արդեն խոսվում է նոր առաջարկների մասին:
ՀԱԿ անդամ, «Ժողովրդավարական հայրենիք» կուսակցության նախագահ Պետրոս Մակեյանից փորձեցինք ճշտել, թե արդյո՞ք հանուն ԼՂ հարցի սեպտեմբերին էլ ջրբաժան չի լինի։ Ի պատասխան՝ նա նշեց, որ կարող է արտահայտել իր կուսակցության դիրքորոշումը, որը բարձրացվելու է ՀԱԿ քաղաքական խորհրդում:
Մակեյանը նշեց, որ Կազանից հետո հասկանալի է, որ այդ հանդիպումից դժգոհ կողմը Ադրբեջանն է, և այժմ առաջարկվելիք նոր փաթեթը պետք է որ համաձայնեցված լինի Ադրբեջանի շահերին:
«Սերժ Սարգսյանը և վարչախումբը, առավել լավատեղյակ լինելով այդ իրավիճակից, ճիշտ կանեին իրենք փորձեին ի նպաստ Ղարաբաղի տանել ներքին հանգուցալուծումը: Իմ կարծիքով, այս իրավիճակը հաղթահարելու համար Սերժ Սարգսյանը պետք է հրաժարական տա և գնա արտահերթ ընտրությունների, այդ դեպքում միջազգային հանրությունն էլ այլընտրանք չի ունենա և կհամբերի, ինչպես նաև հնարավորություն կընձեռվի ԼՂ-ն ընդգրկել բանակցային գործընթացներում»,- մանրամասնեց Մակեյանը:
Մակեյանը նկատեց, որ ինչքան երկար մնա ճահճացած, հարաբերական անդորրը, այնքան այն վտանգավոր է հայ ժողովրդի, պետության և Ղարաբաղի համար. «Արմատական ցնցումները միշտ վատ հետևանքների են հանգեցնում, ու այս անգամ քայլը մնում է իշխանություններին։ Մարտի 1-ից հետո այլևս զիջող կողմը պետք է իրենք լինեն»:
