Այսօր՝ ապրիլի 17-ին, ԱԺ-Կառավարություն հարցուպատասխանի ժամանակ «Լուսավոր Հայաստան» խմբակցության ղեկավար Էդմոն Մարուքյանը, դիմելով վարչապետին, ասաց. «2007թ. հոկտեմբերի 17-ին Գյումրիում ԳԱԼԱ-ին Ձեր տված հարցազրույցից հետո նրա դեմ սկսվել է բռնարարքների շարք, հարկայինը 25 մլն դրամ տուգանել է, որից հետո մարդիկ դրամահավաք են արել՝ վճարել են, իսկ հետո Վանաձորի փաստաբանական գրասենյակը դիմել է ՄԻԵԴ»:
Նրա խոսքով՝ ՄԻԵԴ-ի որոշման հիման վրա Հայաստանում վերաբացվել է գործը, և վարչական դատարանը վերացրել է այն ակտը, որով 25 մլն դրամ տուգանվել էր ԳԱԼԱ-ն. «Եվ տեղի է ունեցել զարմանալի մի բան. պետությունը բողոքել է ընդդեմ վարչական դատարանի որոշման և ասում է՝ այդ 25 մլն դրամը մենք չենք ուզում վերադարձնել: Դուք տեղյա՞կ եք դրանից»:
Ի պատասխան՝ վարչապետն ասաց. «Ենթադրում եմ, որ այդ վարչական բողոքը գրել են այն նույն մարդիկ, ովքեր ստուգումներ են արել 2007-ին»:
Փաշինյանը, առանց կենտրոնանալու ԳԱԼԱ-ի վրա, հավելեց. «Բացառում եմ, որ Հայաստանում որևէ լրատվամիջոց քաղաքական հետապնդման ենթարկվի»:
Մանրամասները՝ տեսանյութում: