Քիչ առաջ առողջապահության նախարարությունից հաստատեցին «Առաջին լրատվականի» տեղեկությունն այն մասին, որ նախարարությունը հրաժարվել է հղիության ախտաբանության համավճարի ներդրումից և չեղյալ է հայտարարում որոշումը:
Ինչպես արդեն տեղեկացրել ենք, մարտի 1-ից օրական 5 հազար պիտի վճարեին նաև այն հղիները, ովքեր բարդություններով կհայտնվեին հիվանդանոցում: Խոսքը պաթոլոգիկ հղիության մասին է:
«Ծննդօգնությունն ինքը ամբողջությամբ անվճար է լինելու: Մենք ընդամենը հղիության պաթոլոգիայի համար նախատեսում ենք որոշակի համավճարի գաղափար մտցնել թե Երևանում, թե մարզերում»,- «Առաջին լրատվական»-ի հարցին ի պատասխան ասել էր առողջապահության նախարար Դերենիկ Դումանյանը` հավելելով, թե իրենք ուզում են այդպիսով վերահսկելի դարձնել, թե ինչ պաթոլոգիաներ են իրականում լինում:
Ըստ նախարարի` համավճարը չէր վերաբերելու սոցանապահովներին ու անհապաղ բուժօգնության անհրաժեշտության դեպքերին: «Բայց էն մասսան, որը սրա տակ էսօր խախտումներ է անում, մենք դա կբերենք օրինական դաշտ»,- ասել էր նախարարը:
Մինչ այդ հղիները պատրաստվում էին վաղը բողոքի ակցիա անել Առողջապահության նախարարության շենքի առջև: Այդ առիթվ նրանք «Ֆեյսբուքում» «Ձեռքներդ հեռու հղիների գրպաններից» էջ են բացել: «Հասկանալի պատճառներով անընդունելի համարելով այս ամենը՝ կոչ ենք անում բոլորիդ վաղը՝ փետրվարի 28-ին, ժամը՝ 13:00-ին լինել Առողջապահության նախարարության շենքի առջև՝ ոլորտի պատասխանատուներին ցույց տալու մեր դժգոհությունը սույն որոշման վերաբերյալ և պահանջելու կասեցնել այն: Խնդրում ենք հնարավորինս լայն շրջանակներում տարածեք տեղեկատվությունը:
Յուրաքանչյուրիս մասնակցությունը կարևոր է»,- գրված է ֆեյսբուքյան էջում:
