Բաքու-Թբիլիսի-Կարս երկաթուղու շինարարությունն արդեն երկար ժամանակ է հետաձգվում է: Հիմնականում խոսվում է այն մասին, որ պատճառը ֆինանսական է, սակայն կա նաև կարծիք, որ այս ծրագիրը չի իրականացվում, քանզի միջազգային գերտերությունները հույս ունեն առաջընթաց գրանցել հայ-թուրքական գործընթացում և բացել հայ-թուրքական սահմանը:
Վրաստանի հասարակական հետազոտությունների ինստիտուտի հետազոտական կազմակերպության համանախագահ, փորձագետ Գեորգի Թարխան-Մուրավին կարծիք հայտնեց, որ հայ-թուրքական սահմանի բացման պարագայում Բաքու-Թբիլիսի-Կարս երկաթուղին տնտեսապես շահավետ չի լինի: Այդուամենայնիվ, ըստ փորձագետի, երկաթուղու շինարարության հետաձգումը հայ-թուրքական սահմանի բացման հետ կապված չէ:
«Պատճառն ավելի շուտ այն է, որ Թուրքիայում ընտրություններից հետո դեռևս անորոշ վիճակ է և դեռևս որոշում չկա թե՛ երկաթուղու շինարարության, թե՛ հայ-թուրքական գործընթացի վերաբերյալ: Սակայն կարծում եմ՝ մոտակա ամիսներին այդ հարցը կարգավորված կլինի»,- մանրամասնեց Թարխան-Մուրավին:
Վրաց փորձագետի գնահատմամբ՝ մոտ ապագայում հայ-թուրքական սահմանի բացման մեծ հավանականություն չկա, և այդ պատճառով այն չի կարող խոչընդոտել երկաթուղու շինարարությունը:
Գեորգի Թարխան-Մուրավին նկատեց, որ Բաքու-Թբիլիսի-Կարս երկաթուղու շինարարությունը բավականին թանկ նախագիծ է, սակայն կարծես թե գումարները պատրաստ են. «Վրացական կողմի ֆինանսները պատրաստ են, իսկ Թուրքիան էլ այժմ տնտեսական վերելք է ապրում, և չեմ կարծում, որ ֆինանսական խնդիրները կարող են խանգարել շինարարությանը, պարզապես ձգձգումը պայմանավորված է Թուրքիայում տիրող անորոշությամբ, քանզի Թուրքիան այժմ այլ խնդիրներ ունի լուծելու»:
