Գերմանիայի լավագույն բժշկական հաստատությունների համակարգող IMZ ինովացիոն բժշկական կենտրոնի հրավերով եռօրյա այցով Հայաստանում է գերմանացի հայտնի բժիշկ-գինեկոլոգ Յոահիմ Կոխը, ում մոտ հայ կանայք խորհրդատվություն կանցնեն փետրվարի 27-ից մարտի 1-ը:
Գերմանացի բժշկի այցով նաև սկիզբ է դրվում հայ-գերմանական բժշկական նոր համագործակցության, ստեղծվում է մի միություն, որի շնորհիվ հայ բժիշկները կարող են որակավորվել Գերմանիայում և վերադառնալ Հայաստան՝ բերելով գերմանական փորձն ու քաղցկեղի բուժման պրակտիկան, ինչպես նաև գինեկոլոգիայի բնագավառում կիրառվող գերմանական նորարարական մեթոդները:
Կոխը նշում է, որ Գերմանիայում բժշկությունը ցանցային բնույթ է կրում, տարբեր հիվանդանոցների և բուժկենտրոնների մասնագետները մշտական կապի մեջ են միմյանց հետ, մշտապես կատարվում է փորձի և տեղեկատվության փոխանակում, այժմ մտադիր են այդ ցանցի մեջ ներառել նաև հայ բժիշկներին: Հայ-գերմանական բժշկական ասոցիացիայի ստեղծմամբ, ըստ գերմանացի բժշկի, հայ բժիշկները կվերապատրաստվեն Գերմանիայում, ինչն էլ իր հերթին այստեղի հիվանդներին թույլ կտա խուսափել մեծագույն ծախսերից, որ սպասվում էր Գերմանիա բուժման մեկնելու դեպքում: Ասոցիացիան կստեղծվի շուրջ մեկ ամսից:
«Այսօր կրծքի քաղցկեղի բուժման բավականին շատ ու նոր հետազոտական մեթոդներ են կիրառվում: Եթե տասը տարի առաջ կրծքի քաղցկեղ ունեցող կանանց բուժումն իրականացվում էր միայն վիրահատական միջամտությամբ՝ հեռացնելով օրգանը, այսօր նման հիվանդություն ունեցող կանանց մի փոքր մասին է դա սպառնում: Նորարարական մեթոդների միջոցով մենք կարողանում ենք շատ շուտ նկատել քաղցկեղաստեղծ գոյացությունների առաջացումը, ինչպես նաև կանխել այն»,- ասաց բժիշկը:
