Լուրեր
Փաշինյանի բեռը շատ ծանր է. մեր հանրության մոտ տոտալ անտեղյակություն է

«ԵԽԽՎ ամբիոնից Հայաստանի վարչապետ Նիկոլ Փաշինյանի ելույթը դիտել եմ երեք անգամ, առաջին անգամ կենտրոնանում ես բովանդակության վրա, երկրորդ անգամ փորձում ես հասկանալ, որ հարցին ինչքան ժամանակ է նվիրված և որ հարցերն են շեշտադրված, և երրորդ անգամ դիտելով՝ ուսումնասիրում ես ելույթ ունեցողի ժեստիկուլյացիան, միմիկան և ուրիշների ռեակցիան»,- այս մասին «Առաջին լրատվական»-ի հետ զրույցում ասաց քաղաքագետ Անուշ Սեդրակյանը:

«Այդ ելույթից շատ բան էր կախված: Առաջի հերթին ողջունում եմ այն փաստը, որ Փաշինյանը խոսեց հայերեն՝ իր խոսքը ներկայացնելով տպավորիչ»,- նշեց քաղաքագետը՝ հավելելով, սակայն, որ խոսքը շատ դետալային էր, և վարչապետի ելույթի վրա ԱԳՆ ձեռագիրը չկար:

«Կարևոր էր, որ ելույթում խոսվեց ժողովրդավարության և հումանիզմի արժեբանության մասին: Վարչապետը շեշտադրում արեց Արցախի անկախ պետություն լինելու վերաբերյալ, դա հատուկ ուղերձ է, որպեսզի հասկանան, թե ինչ ձևաչափով են ընթանալու բանակցությունները՝ եռակողմ, և այն, որ Արցախը Հայաստանի մարզ չէ»,- նկատեց մեր զրուցակիցը:

Քաղաքագետի դիտարկմամբ՝ Հայստանում դեռևս ինստիտուտների կայացման խնդիր կա. «Ժողովրդավարությունը բարի կամքով չէ, ինստիտուտներով է: Հայաստանում առկա կարևոր խնդիրներից է մեր հանրության տոտալ անտեղյակությունը: Մեր հանրությունը բացարձակապես մնում է իր հույսերի և հուզերի գերին: Եվ փոխանակ հանրությանը կրթելու, ֆեյքնյուզերը փակելու հարցն ենք դնում, դա դիլեմայի առաջ է կանգնեցնում, և եվրոպայի դիտանկյունից՝ դա ազատ խոսքի խոչընդոտում է»:

Ա. Սեդրակյանը համոզված է, որ քաղաքական մթնոլորտի վրա ֆեյքնյուզերը չեն կարող ազդել, նույնիսկ եթե ճշմարտություններ գրեն. «Փաշինյանը խարիզմատիկ է, թիմը՝ ոչ… Ով իշխանությանը քննադատի, հակահեղափոխական, իսկ Փաշինյանը՝ ճիշտ կհամարվի: Փաշինյանի հետ թիմ է աշխատում, բայց մեր հանրությունը թիմին թողնում է լուսանցքում, և անձնավորում, բեռը դնում է Փաշինյանի վրա: Հիացմունքի բեռին հաջորդում է պահանջի բեռը. վարչապետի բեռը շատ ծանր է»:

 

Մանրամասն՝ տեսանյութում:

  • Դիտումներ՝ *