Թուրքական Haberler.com կայքի փոխանցմամբ՝ թուրք ընդդիմադիրների կողմից հայտարարված խորհրդարանական բոյկոտի արդյունքում ստեղծված լարված իրավիճակում այսօր հայտնի է դառնալու Թուրքիայի Ազգային մեծ ժողովի (ԹԱՄԺ) նախագահի անունը։
Իշխող «Արդարություն և զարգացում» կուսակցությունը (ԱԶԿ) ԹԱՄԺ-ի նախագահի պաշտոնում առաջադրել է 60-րդ (նախկին) կառավարության փոխվարչապետ Ջեմիլ Չիչեքի թեկնածությունը։
Չիչեքի թեկնածությունը հավանության է արժանացել գլխավոր ընդդիմադիր ուժ Ժողովրդա-հանրապետական կուսակցության (ԺՀԿ) կողմից, որն այդ պաշտոնում չի առաջադրել սեփական թեկնածուին։ Իսկ ահա «Ազգայնական շարժում» կուսակցությունն (ԱՇԿ) առաջադրել է Անթալիայից ընտրված պատգամավոր Թունջա Թոսքայի թեկնածությունը։
ԹԱՄԺ-ի նիստը մեկնարկելու է տեղական ժամանակով ժամը 14:00-ին և տևելու է այնքան, մինչև որ հայտնի դառնա ԹԱՄԺ նախագահի անունը։ Ակնկալվում է, որ Չիչեքը ԹԱՄԺ 25-րդ նախագահի պաշտոնում կընտրվի 3-րդ փուլի արդյունքներով։ Առաջին 2 փուլերում Չիչեքի ընտրության համար անհրաժեշտ է 550 հոգանոց ԹԱՄԺ-ի 2/3-ի աջակցությունը՝ 367 քվե։ Մինչդեռ եթե դա տեղի չունենա, ապա 3-րդ փուլում անհրաժեշտ է ստանալ ընդամենը սովորական մեծամասնություն՝ 276 քվե (50% +1)։
Եթե 3-րդ փուլում էլ չի ապահովվում անհրաժեշտ քվեների աջակցությունը, ապա ամենաշատ քվեներ ստացած երկու թեկնածուների համար իրականացվում է 4-րդ փուլը, ուր արդեն ակնհայտ է Ջեմիլ Չիչեքի առավելությունը, քանի որ ԱԶԿ-ն ԹԱՄԺ-ում ունի 327 ներկայացուցիչ, իսկ ԱՇԿ-ն՝ 53 ներկայացուցիչ։
Հիշեցնենք, որ խորհրդարանական բոյկոտի մասնակից ԺՀԿ-ն ԹԱՄԺ-ում ունի 135 մանդատ, իսկ անկախ թեկնածուները՝ 35 մանդատ։
