Այսօր ուշ գիշերը գերմանական Համբուրգ քաղաքի «Իմտեկս Արենա» մարզադաշտում 50 հազար հանդիսականների ներկայությամբ կայացավ անգլիացի Դևիդ Հեյի և ուկրաինացի Վլադիմիր Կլիչկոյի երկար սպասված մենամարտը, որում խաղարկվում էր միանգամից 3 (IBF, WBA, WBO) չեմպիոնական գոտի: Գերծանրքաշային կարգում վերջին անգամ նման աստղային մենամարտ տեղի էր ունեցել հեռավոր 1999 -ին, երբ Լենոքս Լյուիսը հաղթեց Էվանդեր Հոլիֆիլդին:
Առաջին ռաունդը երկուսն էլ շատ ակտիվ սկսեցին: Կլիչկոն անընդհատ փորձում էր իր ֆիրմային ջեբ հարվածներն անցկացնել, սակայն բրիտանացին արագության հաշվին կարողանում էր ամեն անգամ խուսափել: Բռնցքամարտիկները նույն ոճով շարունակեցին մինչև 5-րդ ռաունդը: 5-րդ ռաունդում Կլիչկոն կրկնակի հարվածով քիչ էր մնում տապալեր Հեյին, սակայն բրիտանացին մեծ ջանքերի գնով կարողացավ ոտքի վրա մնալ:
6-րդ ռաունդից սկսած ուկրաինացու մոտ հոգնածություն էր նկատվում և 7-րդ ռաունդում մրցավարն անգամ միավոր հանեց Կլիչկոյից` անընդհատ մրցակցից կախվելու համար: Բացի այդ Հեյին հաջողվեց երկու լավ հարված անցկացնել: 7-րդ և 8-րդ ռաունդներն անկասկած գրանցվեցին բրիտանացու օգտին:
Այդուհետ Կլիչկոն հավաքվեց և հաջորդ 3 ռաունդներում մրցակցից շատ ավելի ակտիվ էր գործում: Վերջին 12-րդ ռաունդն անցավ անհամեմատ սուր պայքարում. երկու մարզիկներն էլ ցանկանում էին մեկ հարվածով ավարտել մարտը, սակայն նոկաուտ այդպես էլ չգրանցվեց:
Արդյունքում մրցավարների միաձայն որոշմամբ հաղթանակը շնորհվեց Վլադիմիր Կլիչկոյին (118:108, 117:109, 116:110):
Փաստորեն իրականացավ Կլիչկո եղբայրների երազանքը. այժմ նրանց են պատկանում գերծանրքաշային կարգում չեմպիոնական բոլոր 4 գոտիները: Իսկ Հեյը դեռ մինչև մարտն էր հայտարարել, որ այս հանդիպումը վերջինն է լինելու իր կարիերայում: