«Ժամանակակից գրողի համար ժամանակները նպաստավոր չեն և՛ ստեղծագործելու, և՛ ապրելու համար, թեև վերջին տարիներին ինչ-որ շարժ է նկատվում. ակտիվանում է գրքի տպագրությունը, և կարծես թե ընթերցողներ են ավելանում»,- այս մասին «Առաջին լրատվական»-ի հետ զրույցում ասաց Գ. Սունդուկյանի անվան պետական ակադեմիական թատրոնի փոխտնօրեն, դրամատուրգ, արձակագիր Նելլի Շահնազարյանը՝ անդրադառնալով հարցին, թե ինչ խնդիրների է բախվում այսօր գրողը: «Չկան ո՛չ առաջվա ընթերցողը, ո՛չ հետաքրքրությունները, սակայն, ամեն երկրորդ-երրորդ մարդ գրող է. գրում են և շնորհանդես են անում, մեծարվում. անհետաքրքիր է դարձել»,- նշեց մեր զրուցակիցը:
Դրամատուրգը նաև նկատեց, որ այժմ չկան մեծանուն գրողներ. «Հրանտ Մաթևոսյանի չլինելով՝ կարծես տապալվեց գրական կաղնին, ու դաշտը դատարկվեց: Հրանտ Մաթևոսյանի անունը շատերին զգաստացնում էր, բոլորը չէ, որ վազելով կգրեին ու կտպագրվեին. անհանգստություն կար՝ ինչպես կընդունվեր»:
Ն. Շահնազարյանը նաև մտահոգություն հայտնեց Հ. Մաթևոսյանի կենտրոնի կիսակառույց մնալու և կենտրոնի բացումը անընդհատ ձգձգելու հետ կապված՝ ընդգծելով, որ Մեծերի հետ այդպես չի կարելի վարվել, և որ այդ կենտրոնի միջոցով ոչ միայն հնարավոր կլինի աշխարհին ներկայացնել մեր գրողին, այլ նաև կապ հաստատել, հրավիրել աշխարհի տարբեր նշանավոր գրական գործիչների, բուռն գրական մշակույթ ծավալել:
Մանրամասն՝ տեսանյութում: