Այն, որ հանրությունը երկար է սպասել այս հարկային օրենսգրքի կյանքի կոչմանը, և օրինակ, եթե ոչ մի բան չձեռնարկվի, նախորդ կառավարության կողմից ընդունված օրենսգրքով շրջանառության հարկի շեմը 58,35 մլն դրամ պետք է լինի։ Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Արտակ Մանուկյանը։
Նրա խոսքով, այս մասով կա կոնսենսուս, որ պետք է շեմը լինի 115 մլն դրամ. «Որքան մենք հետաձգում ենք այս կոնսենսուսի պրակտիկ լուծումը, այնքան բիզնեսի մոտ հավելյալ ռիսկեր ենք ստեղծում։ Այսինքն հարցերի որոշակի համախումբ կա, որ լիարժեք, միանշական կարելի էր և պետք է հրատապ լուծումներ տալ, որպեսզի սուբյեկտների վարքագծի վրա կարողանանք ազդել։ Իհարկե, կան հարցեր, որոնք երբ ներկայացվի օրենսգիրքը, հավելյալ ուսումնասիրությունների կարիք լինի, այդ թվում նաև հիմնավորումները։ Օրինակ, գրավատների մասով մի փոքր անհասկանալի է, երբ ասում ենք՝ տուրքի մակարդակը բարձրացնում ենք, որովհետև երկար ժամանակ չի բարձրացվել։ Եթե եկամտաբեր ուղղությունն ենք բարձրացնում, կարող ենք ասել՝է ծախսաստեղծ ուղղությունն էլ եկեք բարձրացնենք՝ նվազագույն ամսական աշխատավարձ, գիշերակացներ և այլն։ Կամ ինչու պետք է տուրքը բարձացնենք 60 անգամ, այլ ոչ 50 անգամ կամ 15 անգամ։ Սրանք հարցեր են, որոնց պատասխաններն ակնկալում ենք ստանալ»,-ասաց Արտակ Մանուկյանը։
