«Սասնա ծռեր» կուսակցությունը սկսում է Արցախը ՀՀ-ի կազմում՝ մարզի կարգավիճակում ներառելու գործընթացը: Կուսակցությունն առայժմ չի հստակեցնում, թե իրավական ինչ ճանապարհով են այդ գործընթացը պատկերացնում՝ հանրաքվեի, երկու երկրների խորհրդարանների որոշմամբ, թե այլ ուղով: Ինչ վերաբերվում է արցախյան ներքաղաքական կյանքին, այսօր հրավիրված մամուլի ասուլիսում «Սասնա ծռեր» կուսակցության նախաձեռնող խմբի անդամ Ժիրայր Սեֆիլյանը նշեց, որ հասարակական համախմբումը Արցախում պետք է կայանա Հայաստանին միավորվելու գաղափարի շուրջ. «Համախմբումը պետք է լինի միացման գաղափարի շուրջ, այդ համախմբումը իր միջից կծնի առաջնորդող խումբ, ինչու չէ նաև համակարգող, որը կարող է լինել նախագահի թեկնածու, այդ քայլերից հետո հնարավոր կլինի ժողովրդին հանել փողոց և ժողովրդի ճնշմամբ իրականացնել իշխանափոխություն: Եթե մինչև 2020թ մայիս չհասցնենք, ապա 2020-ի ապրիլ-մայիսին կայանալիք ընտրությունների առիթը կօգտագործենք մոբիլիզացիան իրագործելու համար»:
Ժիրայր Սեֆիլյանը չհստակեցրեց, թե Արցախի նախագահի իրենց նախընտրելի թեկնածուն ով է՝ նշելով, որ «երևացողներից ոչ մեկին» չեն սատարելու և պարտադիր էլ չէ, որ «Սասնա ծռերը» թեկնածու առաջադրի: Նա նաև ընդգծեց, որ իրենք կաջակցեն այն թեկնածուին, որը «հին կլանի հետ» կապ չունի: Ինչ վերաբերվում է Արցախի ՊԲ նախկին հրամանատար Սամվել Բաբայանի հավակնություններին`առաջիկա ընտրություններին մասնակցելու, Ժիրայր Սեֆիլյանը նշեց. «Սամվել Բաբայանի ակտիվացումը Արցախում մենք ողջունել ենք, և ասել ենք, որ ոչ մի շրջանակ իրավունք չունի խոչընդոտելու Սամվել Բաբայանի քաղաքական գործունեությունը: Միաժամանակ հորդորել ենք Սամվել Բաբայանին, որ ճիշտ պիտի լիներ, եթե ինքը աջակցողի դերում լիներ՝ մեր պատկերացրած նոր անձնավորությանը հասցնելու իշխանության: Հուսով ենք, տակավին ժամանակ կա: Առաջիկա ժամանակներում չի բացառվում, որ ինքը այդ մտքին էլ լինի: Մենք այդ ուղղությամբ պիտի աշխատենք»:
Հարցին՝ համագործակցությունը նրա հետ չե՞ք բացառում, Սեֆիլյանն արձագանքեց. «Մեր համագործակցության նախապայմանը մեկն է՝ միացման գաղափարը: Այն ուժերը, այն անհատները, որոնք առաջնահերթ օրակարգ են համարում դե յուրե միացումը, մենք բոլորի հետ պատրաստ ենք գործակցելու»:
Մանրամասն՝ տեսանյութում:
