«Թերևս առաջին անգամ է, երբ որևէ պաշտոնյայի աշխատանքը գոհացնում է հասարակությանը, գոհացնում է այն խմբին, որոնք զբաղվում են տվյալ ոլորտի գործունեությամբ, բայց չգիտես ինչու, չի գոհացնում կառավարությանը։ Այնպես որ, պատճառները պետք է այլ տեղ փնտրել, և ոչ թե գործունեության արդյունավետության մեջ»,- «Առաջին լրատվական»-ի հետ զրույցում ասաց Բնապահպանության և ընդերքի տեսչական մարմնի նախկին ղեկավար, բնապահպան Արթուր Գրիգորյանը։
Ըստ ձեզ, որո՞նք են այն բնապահպանական խնդիրները, որոնց առջև այսօր կանգնած է Հայաստանը, և ի՞նչ պետք է արվի դրանք լուծելու ուղղությամբ «Առաջին լրատվական»-ի հարցին Արթուր Գրիգորյանը պատասխանեց․ «Դրանց մասին շատ ենք խոսել։ Հիմա մի շատ կարևոր գործընթաց է տեղի ունեցել, որի մասին, կարծես թե, շատ չի խոսվում։ Բայց դա առանցքային նշանակություն ունի՝ բնապահպանական և ոչ միայն։ Քաջարանի հանքավայրի ստուգումներն են հրապարակվել, բայց կարծես թե հրապարակվել են մասնակի։ Ես կարծում եմ, որ ամբողջական չի ներկայացված»։
Բնապահպանը նաև հավելեց․ «Կան կառավարության որոշումներ, որոնցով սահմանված են ընթացակարգեր, թե ինչպես է շրջակա միջավայրին պատճառված վնասը հաշվարկվում։ Երբ ստուգում է իրականացվում՝ գնահատվում է, թե, օրինակ, թույլատրելիից որքան է ավելի արտանետվել, կամ որքան է ջրահոսք աղտոտիչ նյութեր արտահոսք թույլատրվել, և, ըստ այդմ, հաշվարկը իրականացվում է»։
Մանրամասները՝ տեսանյութում։
