Ստեփանակերտում տեղի ունեցավ Հայաստանի և Արցախի անվտանգության խորհուրդների համատեղ նիստը, որտեղ նաև ելույթ ունեցավ ՀՀ վարչապետ Ն. Փաշինյանը, և շատերը նրա ելույթը գնահատեցին որպես աննախադեպ: Ի՞նչ ուղերձներ էր պարունակում վարչապետի ելույթը: «Առաջին լրատվական»- ի հետ զրույցում անդրադառնալով այս հարցին՝ հրապարակախոս Հրանտ Տեր-Աբրահամյանը Փաշինյանի ելույթը համարեց չափազանց կարևոր. «Իշխանափոխությունից հետո սա ամենակարևոր ելույթն էր իշխանության կողմից:
Հասցեատերերը բազմազան էին. սա և՛ պատասխան էր Մինսկի խմբի համանանախագահների հայտարարությանը, այսինքն՝ պատասխան էր դրսին, նաև սիմվոլիկ էր Արցախում տեղի ունենալը, սա նաև ուղերձ էր Հայաստանին և Արցախին: Փաշինյանի ելույթում ուղերձ կար նաև ուղղված Ադրբեջանի ժողովրդին, թերևս, առաջին անգամ: Խոսքն անուղղակիորեն ուղղված էր նաև միջազգային հանրությանը՝ հասկացնելով, որ կոնֆլիկտը լուծելու համար կա նաև առանց միջնորդների ճանապարհ… Փաշինյանի ելույթում նաև խաղաղության կոչ կար»:
Հրապարակախոսի դիտարկմամբ՝ Արցախյան կոնֆլիկտը այսքան տևական է և չի լուծվում նաև այն պատճառով, որ դարձել է աշխարհաքաղաքական հարաբերությունների մաս, և միջնորդ պետությունների շահերի ներգրավում նույնպես կա, որը չի թողնում, որ կոնֆլիկտը լուծվի: «Կա նենգափոխում, որ ժողովուրդները չեն կարողանում իրենք հաշտվել, և պետք է միջնորդները հաշտեցնեն: Փաշինյանի ելույթում ես տեսնում եմ ակնարկ այն մասին, որ կարող ենք այնպես անել, որ հաշտվենք, և միջնորդության կարիք չլինի, այդ դեպքում աշխարհաքաղաքական շահերը դուրս կմղվեն: Սա բավականին ռիսկային հայտարարություն է: Փաշինյանը, այսպես ասած, ատամներ է ցույց տալիս միջազգային հանրությանը, դրանից չպետք է վախենալ»:
Մանրամասն՝ տեսանյութում:
