ԱՄՆ զինված ուժերի եվրոպական հրամանատարությունը առաջարկել է Թուրքիային F-35 կործանիչներ չվաճառել, եթե նա ավարտին հասցնի C-400 հրթիռային համակարգերի ձեռքբերման գործարքը Ռուսաստանի հետ: Այս մասին հայտարարել է Եվրոպայում ՆԱՏՕ-ի միացյալ ռազմական ուժերի գլխավոր հրամանատար, գեներալ Քերտիս Սկապարոտին, հաղորդում է ТАСС-ը:
Գեներալը մատնանշել է, որ С-400-ը անհամատեղելի է ՆԱՏՕ-ի հակահրթիռային և հակաօդային պաշտպանության համակարգերի հետ: «Երկրորդ խնդիրը F-35-ի հետ է, սա խնդիր է մեր բոլոր ինքնաթիռների համար, ես կարծում եմ, հատկապես F-35-ի համար: Իմ որպես զինվորականի լավագույն խորհուրդը կլինի F-35-ի գործարքն ավարտին չհասցնելը, որպեսզի նրանք մարտական թռիչքներ չիրականացնեն այն պայմաններում, երբ մեր դաշնակիցը ռուսական համակարգեր է օգտագործում, հատկապես հակաօդային պաշտպանության համակարգեր»,- ասել է Սկապարոտին:
«Հուսով եմ, Թուրքիան կվերանայի C-400-ի այս որոշումը, որի պատճառով նա կարող է պոտենցիալ կորցնել շատ այլ համակարգեր»,- հավելել է նա:
Մարտի 2-ին հաղորդվել է, որ ԱՄՆ ներկայացուցիչը արդեն հինգ անգամ հանդիպել է թուրքերին՝ փորձելով նրանց հետ պահել ռուսական հրթիռային համակարգերի գնումից, և որ Վաշինգթոնը քննարկում է F-35-ի օգնությամբ Անկարայի վրա ճնշելու գործադրելու հնարավորությունը:
