Պապուա-Նոր Գվինեայի տարածքում գտնվող փախստականների ավստրալական ճամբարում տեղի են ունեցել անկարգություններ, որոնց հետևանքով 1 մարդ է զոհվել: Այս մասին հայտնում է France-Presse գործակալությունը:
Անկարգությունները Մանուս կղզու ճամբարում սկսվել էին փետրվարի 16-ի լույս 17-ի գիշերը, երբ մի քանի տասնյակ մարդիկ փորձել էին փախչել ճամբարից: Անվտանգության աշխատակիցներին հաջողվել էր կանխել փախուստը: 8 մարդ ձերբակալվել է, 19-ը՝ վիրավորվել:
Հաջորդ գիշեր անկարգությունները վերսկսվել են: Զոհվել է 1, վիրավորվել 77 մարդ: Տուժածներից մեկի վիճակը ծայրահեղ ծանր է: Հանգամանքները, որոնց դեպքում տուժել են ճամբարի բնակիչները, չեն հստակեցվում:
Ավստրալիայի միգրացիոն հարցերով նախարար Սկոտ Մորիսոնը ներգաղթյալի մահը ողբերգություն է համարել, սակայն նշել է, որ մարդիկ, ովքեր բռնի կերպով են բողոք արտահայտում, իրենց դնում են ռիսկային դրության մեջ: Մորիսոնը նաև հայտնել է, որ ճամբարի ենթակառուցվածքն անկարգությունների ընթացքում չի տուժել: