Լիբիացի կանայք պատասխանել են Մուամար Քադաֆիի կոչին՝ կանգնել նրա կողքին և պաշտպանել ապստամբներից ու ՆԱՏՕ-ից,- փոխանցում է CNN-ը: Հիմա տարբեր տարիքի կանայք պաշպանում են Տրիպոլիում Քադաֆիի նստավայրը և նրա շրջակայքը: Բայց մինչև զենք ստանալը նրանք զինվորական պատրաստություն են անցնում երկրի հարավում գտնվող Բնու Վալիդ քաղաքում:
Ինչպես պատմել է կանանց մարզող սերժանտ Ֆարաջա Ռամադանը, նրանք «պատրաստվում են պաշտպանել Մուամարին և երկիրը»:
«Նրանք սովորում են, թե ինչպես պետք է զենք օգտագործել, քանդել, հավաքել այն և կրակել»,- ասում է նա: «Կանայք անցել են ուսուցումը և ստացել են իդեալական գնահատականներ»:
Քադաֆիի կին պաշտպաններից մեկի՝ 40-ամյա Ֆատիս Մասուդի խոսքերով, իրեն դուր է եկել ուսուցումը ռազմական կենտրոնում, և չի զղջում, որ լքել է իր նախկին աշխատանքը կարի արհեստանոցում:
«Ինձ դուր է գալիս մարզվել և պաշտպանել իմ երկիրը: Հիմա ես տարբեր տարիքի կանանց սովորեցնում եմ, թե ինչպես օգտվել զենքից»,- ասել է Մասուդը: «Պետք չէ թերագնահատել կնոջը Լիբիայում… Կինը կարող է անել ավելին, քան դուք կարծում եք»,- ասել է Ջամահիրիայի պաշտպաններից մեկ ուրիշը, որը ցանկացել է մնալ անանուն:
