ԱՄՆ-ում արտերկրում ռուսական տեղեկատվական ազդեցության դեմ պայքարի գլոբալ համակարգի ծրագիր են պատրաստել, գրում է «Իզվեստիան»՝ վկայակոչելով երկու աղբյուր:
Պարբերականի տվյալներով, Միացյալ Նահանգները 2019-2020 թվականներին մտադիր է ազգային թվային հետազոտությունների ցանց հիմնել աշխարհի մի շարք երկրներում: Նախատեսվում է մասնակցության համար ծրագրում ներգրավել Facebook-ը, Twitter-ը և Google-ը, ինչպես նաև տեղական լրատվամիջոցներն ու հասարակական կազմակերպությունները:
Տեղեկացվում է, որ առաջին երեք պիլոտային ծրագրերը կմեկնարկեն արդեն այս գարնանը Վրաստանում, Մերձբալթիկայում և Բալկաններում: Աղբյուրներից մեկը նշել է, որ այս տարածաշրջանների ընտրությունը կապված է այն փաստի հետ, որ այս երկրներում բնակչության որոշակի մասը «բարյացկամորեն է վերաբերվում Ռուսաստանին և նրա ղեկավարությանը»:
Ենթադրվում է, որ նման կենտրոնների գործունեության նպատակը լինելու է տվյալ երկրների հասարակական կարծիքի վրա Ռուսաստանի ազդեցության բացահայտումն ու կանխումը:
