Грузия Online-ը, վկայակոչելով IzRus-ին, նշում է, որ Վրաստանը խոստանում է Պաղեստինի հարցում աջակցել Իսրայելին։ Այս մասին հայտարարել է Վրաստանի նախագահական ապարատի բարձրաստիճան աշխատակից Էլեն Տևդորաձեն։
Նշվում է, որ այս շաբաթ Հրեական համաշխարհային կոնգրեսի հրավերով Իսրայել են ժամանել աշխարհի 22 երկրներ ներկայացնող և հրեական ծագում ունեցող 50 քաղաքական գործիչներ։ Դրանց թվում է եղել նաև Տևդորաձեն, որը նշել է.
«Պաղեստինի հարցում Վրաստանը միանշանակ աջակցում է Իսրայելին։ Վրաստանը նմանատիպ խնդիրների հետ է բախվում Աբխազիայում և Հարավային Օսիայում։ Վրաստանի այդ տարածքներն այսօր օկուպացված են ռուսական բանակի կողմից»։
Հիշեցնենք, որ գարնանը որոշակի լարվածություն էր առաջացել վրաց-իսրայելական հարաբերություններում, և փոխարենը ջերմացում էր նկատվել աբխազ-իսրայելական հարաբերություններում։