2020 թվականին Արցախում սպասվում են Ազգային ժողովի և նախագահի ընտրություններ: Արցախյան հնարավոր ներքաղաքական զարգացումները քննարկելու համար «Առաջին լրատվական»-ը հյուրընկալել է Մարդկային զարգացման միջազգային կենտրոնի ղեկավար Թևան Պողոսյանին:
Մեր զրուցակցի կարծիքով՝ այն գլոբալ փոփոխությունները, որ տեղի են ունեցել Հայաստանում, բնականաբար իրենց արտահայտությունն են գտնելու նաև Արցախում. «Արցախը հայկական ոգու զարթոնքի փոփոխությունների մեջ է»:
Դիտարկմանը, որ շրջանառվում են բազմաթիվ անուններ, որոնք հավակնում են Արցախի նախագահի պաշտոնին, Թևան Պողոսյանն ասաց. «Ես վստահ եմ, որ էլի կուսակցություններ են լույս աշխարհ գալու: Ինձ թվում է՝ մենք ունենալու ենք մոտ 10-11 թեկնածու»: «Այնտեղ պետք է այնպիսի մակարդակի ընտրություններ անցկացվեն, որ որևէ մեկի մեջ կասկած չլինի, որ իրենք հենց ընտրված ներկայացուցիչներն են, և իրենք են լինելու այն մարդիկ, ովքեր պետք է միանան բանակցային սեղանին, իսկ մենք պետք է նպաստենք, որ այդ ընտրությունների արդյունքները աշխարհում դառնան լրջագույն. այստեղ աշխատանք ունի անելու Հայաստանը»,- հավելեց նա՝ հիշեցնելով բանակցային սեղանին Արցախի անունից չբանակցելու Հայաստանի դիրքորոշումը:
Թևան Պողոսյանը վստահ է, որ Երևանը կմնա իր խոսքի տերը և չի փորձի ներգրավվել Արցախի ընտրություններին. «Զարգացման այս նոր փուլը ունենալու է իր յուրահատկությունները ինչպես դիվանագիտական ձևով ներկայացնելու, այնպես էլ մեր ներքին լսարանի համար. անհնարին է Արցախին մենակ թողնել, բայց դրա հետ միասին պետք է գիտակցել, որ Արցախը որևէ մեկի գրպանում ո՛չ բլիթ է, ո՛չ որևէ խաղալիք, որ մեկը կարողանա հանի և վրայից մի մաս պոկի-տանի և մեկին տա: Արցախի խոսքն իր տեղն ունի»:
Հարցազրույցն ամբողջությամբ՝ տեսանյութում: