Այսօր՝ փետրվարի 21-ին, Կոտայքի մարզի Հրազդան քաղաքում գործող «Հրազդան ցեմենտ քորփորեյշն» ՍՊԸ-ի բակում են հավաքվել մեծ թվով քաղաքացիներ, ովքեր պահանջում են, որ գործարանի ղեկավարությունը իրենց 1 ամսվա աշխատավարձը կանոնավոր վճարի, ինչպես որ կնքված է աշխատանքային պայմանագրում: Այս մասին հայտնում է Shamshyan.com-ը:
Գործարանի բակում հավաքված ասել են, որ առավոտից երեկո կանոնավոր աշխատել են՝ 380-400 հոգով: «Մեր ուզածը մեր քրտինքով վաստակածն է։ Ամեն օր չենք կարող վարկային կազմակերպությանը, էլեկտրացանցի տեսուչին, գազի տեսուչին խաբել, թե վաղը վճարումները կանենք»:
Գործարանի աշխատակիցները հայտնել են, որ իրենց հույսը կառավարությունն է, որ կարող է միջամտել և խնդիրը լուծել. «Ավել գումար մենք չենք ուզում ու պահանջում։ Պարզապես պնդում ենք, որ ժամանակին վճարեն մեր աշխատավարձերը»։
Գործարանի ներսում տնօրենի ժամանակավոր պաշտոնակատար ներկայացած Սուրիկ Միքայելյանը հայտարարել է, որ իրենք մարտի 5-ին հնարավոր է՝ աշխատավարձը տան: Նա պատճառաբանել է, որ ցեմենտը չի վաճառվում, դրա համար էլ չեմ կարողացել վճարել:
Այդ պատասխանը աշխատակիցներին չի բավարարել, և նրանք պահանջել են հանդիպում սեփականատեր համարվող Խաչատուրովը։
Այնուհետև աշխատակիցների հետ հանդիպել է առաքման բաժնի պետը, որը հայտարարել է, որ ժամը 3-ին իրենք պատասխան են տալու աշխատակիցներին և նեղսրտել, թե ինչու են լրագրողի ներկայությամբ իրենց «չնչին գրոշները» պահանջում։
Այնուհետև առաքման բաժնի պետը հանդիպումը կիսատ է թողել և հեռացել։
Եթե այսօր դրական պատասխան չստանան գործարանի աշխատակիցները, կդիմեն Կոտայքի մարզպետին, իրենց պատգամավորներին, անհրաժեշտության դեպքում նաև վարչապետ Նիկոլ Փաշինյանին։
