ԱՄՆ առևտրային դաշնային հանձնաժողովը (FTC) և Facebook սոցկայքի ղեկավարությունը «բազմամիլիարդանոց» տուգանքի շուրջ բանակցություններ են վարում՝ օգտատերերի գաղտնիությունը խախտելու վերաբերյալ սոցկայքի նկատմամբ հետաքննության հետ կապված։ Այս մասին գրում է The Washington Post-ը։
Պարբերականի տվյալներով՝ ամերիկյան մեդիամագնատի նկատմամբ տուգանքը կդառնա ամենամեծը, որը FTC-ն երբևէ պարտավորեցրել է վճարել տեխնոլոգիական ընկերություններին, սակայն տվյալ պահին կողմերը գանձման կոնկրետ գումարի շուրջ չեն պայմանավորվել։ Նշվում է նաև, որ Facebook-ը նախնական անհանգստություն է հայտնել FTC-ի պահանջների հետ կապված։
Պարբերականի հեղինակները ենթադրում են, որ եթե բանակցություններն ընդհատվեն, դատական պարզաբանումները կարող են դատարանում լուրջ դիմակայության վերածվել։
Facebook-ը հաստատել է բանակցությունների փաստը, FTC-ն հրաժարվել է մեկնաբանություններից։
