Грузия Online-ի փոխանցմամբ՝ Վրաստանի փոխարտգործնախարար Նինո Կալանդաձեն հայտարարել է, որ Ռուսաստանը չի աջակցել ՄԱԿ-ում Վրաստանի ներկայացրած բանաձևին և փորձում է քաղաքականացնել այդ հարցը.
«Դժբախտաբար, այս տարի Ռուսաստանը դարձյալ փորձում է քաղաքականացնել հարցը։ Նա ոչ միայն չաջակցեց այդ բանաձևին, այլև հրապարակավ ցույց տվեց իր բացասական վերաբերմունքը դրա նկատմամբ։ Նա միջազգային հանրությանը փորձեց համոզել չաջակցել բանաձևին։
Եթե Ռուսաստանի այդ կոչն արձագանք գտներ այլ երկրների կողմից, ապա դա կնշանակեր, որ ըստ այդ երկրների՝ տեղահանված անձինք իրավունք չունեն վերադառնալ իրենց տները։ Վրաստանը կարող է այդ բանաձևն ամեն տարի ներկայացնել ՄԱԿ, և այդպես կլինի այնքան ժամանակ, քանի դեռ բանաձևի բոլոր կետերն ամբողջովին աջակցություն չեն ստանա»։
Հիշեցնենք, որ ՄԱԿ-ի ԳԱ-ում «Աբխազիայից և Հարավային Օսիայից փախստականների ու ներքին տեղահանվածների մասին» բանաձևի քննարկման ժամանակ դրա օգտին քվեարկել է 57 երկիր, դեմ՝ 13 երկիր, իսկ 74 երկիր էլ ձեռնպահ է մնացել։
