Կուտակային կենսաթոշակային համակարգի դեմ այսօր բողոքի ակցիայի են դուրս եկել ՀԷՑ ՓԲԸ-ի մի քանի տասնյակ աշխատակիցներ, որոնց աշխատավարձից արդեն պահումներ են կատարվել:
Նախապես որոշված էր բողոքի դուրս գալ ավելի մեծ կազմով, սակայն տնօրինությունը սպառնալիքների միջոցով շատերին հետ է պահել այդ քայլից: Ղեկավարությունը անգամ սպառնացել է նրանց աշխատանքից հեռացնել:
ՀԷՑ-ում գրանցված 8 հազար աշխատողներից կենսաթոշակային նոր համակարգը վերաբերում է 2500-ին: Այսօր ժամը 16.00-ին նախատեսված է հանդիպում-քննարկում տնօրինության հետ, սակայն աշխատակիցները կարծում են, որ դա իրենց գլխի տակ փափուկ բարձ դնելու միջոց է:
Աշխատակիցներին միացել են նաև «Դեմ եմ» նախաձեռնության անդամները, ովքեր նշում են, որ մինչև վերջ կանգնելու են բոլոր նրանց կողքին, ում իրավունքները ոտնահարվել են:
Աշխատակիցները և «Դեմ եմ» նախաձեռնության անդամները պահանջում են ժամը 16.00-ին նախատեսված հանդիպումը տեղափոխել և անցկացնել հենց հիմա: Առայժմ նրանք սպասում են:
