«Նա այնքան լկտի լակոտ է, որ իրենից ամեն ինչ էլ սպասելի է»,-«Առաջին լրատվական»-ի հետ զրույցում ասաց գործարար, օֆշորային սկանդալից տուժած Փայլակ Հայրապետյանը՝ արձագանքելով այն տեղեկությանը, որ Աշոտ Սուքիասյանը հրաժարվում է գալ Հայաստան:
Նշենք, որ երեկ Վրաստանի հանրային պաշտպան Իրմա Ինասարիձեն «Հետք»-ին ասել էր, որ Աշոտ Սուքիասյանը չի ուզում, որ իրեն արտահանձնեն Հայաստանի Հանրապետությանը: Իսկ դրանից առաջ արդեն ՀՀ գլխավոր դատախազությունը տեղեկացրել էր, որ միջազգային հետախուզման մեջ գտնվող Աշոտ Սուքիասյանին Թբիլիսիում ձերբակալվելու կապակցությամբ ՀՀ գլխավոր դատախազությունը Վրաստանի գլխավոր դատախազություն է ուղարկել Աշոտ Սուքիասյանին քրեական հետապնդման ենթարկելու նպատակով ՀՀ իրավապահ մարմիններին հանձնելու միջնորդություն: Հանձնման մասին միջնորդությունը դեռևս գտնվում է քննարկման փուլում:
«Առաջին լրատվական»-ը դատախազությունից հետաքրրքվեց՝ կարո՞ղ է անձը հրաժարվել արտահանձնումից, թե ոչ, և ինչպես է այդ դեպքում լուծվում խնդիրը: Դատախազությունից մեզ պատասխանեցին, որ իրենք արդեն Վրաստանի դատախազության հետ քննարկում են էքստրադիցիայի միջնորդությունը և դրան ավելացնելու ոչինչ չունեն: Նշենք, սակայն, որ կոնվենցիաներով հստակ սահմանվում է, թե որ դեպքերում են բավարարվում և որ դեպքերում են մերժվում արտահանձնման մասին միջնորդությունները, և անձը ինքը չի կարող հրաժարվել արտահանձնումից:
Ընդ որում՝ ուշագրավ է, որ երբ պարզ դարձավ, որ Սուքիասյանը ձերբակալվել է, Վրաստանի գլխավոր դատախազը հայտարարեց, որ Սուքիասյանը ցանկացել էր Վրաստանով Հայաստան գալ, և հանկարծ, չգիտես ինչպես, պարզ է դառնում, որ Սուքիասյանը չի ցանկանում տեղափոխվել Հայաստան:
Երբ պարզ դարձավ, որ Սուքիասյանը ձերբակալվել է, մամուլում տարբեր վարկածներ շրջանառվեցին: Մասնավորապես, որ նա եկել է, որպեսզի ամբողջ մեղքն իր վրա վերցնի՝ դրանով մաքրելով օֆշորային սկանդալում ներգրավված վարչապետ Տիգրան Սարգսյանի և իր քավոր Նավասարդ Կճոյանի անունը:
Փայլակ Հայրապետյանը, ով երեկ կրկին հարցաքննվել է ոստիկանությունում, մեզ հետ զրույցում դժվարացավ ասել, թե ինչ սցենարով կընթանա այս գործը՝ Սուքիասյանն ամբողջ մեղքն իր վրա կվերցնի, թե ոչ, բայց նրա խոսքով՝ միայն նա չէ, որ պետք է պատասխանատվության ենթարկվի: «Ճիշտ է, առաջին հերթին պետք է պատասխանատվության ենթարկվի Աշոտը, բայց հետո պետք է պատասխանատվության ենթարկվի բանկը, բանկի ղեկավարությունը, որպեսզի պարզվի, թե ինչպես են այդքան գումար ուղարկել օֆշորային գոտի: Պատասխանատվության պետք է ենթարկվի նաև վարչապետը, կառավարության որոշ անդամներ, քանի որ իրենց հովանավորությամբ է այս ամբողջ պատմությունը սկսվել»,- ասաց Հայրապետյանը:
Վերջինս պատմեց, որ Ամանորին Աշոտ Սուքիասյանը զանգահարել է իրեն, առաջարկել, որ Հայրապետյանն ասի, թե իր նկատմամբ պարտք ու պահանջ չունի, ինքն էլ կգա, կաշխատի ու աստիճանաբար կփակի պարտքը: Հայրապետյանը, բնականաբար, չի համաձայնել: «Նա խաբեբա է, անգամ բանկն է նրա ձեռքը կրակն ընկել: Իմ ամբողջ գույքը հանեցին վաճառքի: Անցած անգամ բանկ էի գնացել, իրենք էլ չգիտեն ինչ անեն, ասում են՝ թող բերի 2 միլիոն վճարի, մենք իրեն ժամանակ կտանք»:
Մենք փորձեցինք նաև Արարատյան հայրապետական թեմի առաջնորդ Նավասարդ արքեպիսկոպոս Կճոյանից պարզել՝ պատրաստվո՞ւմ է ինչ-որ ձևով օգնել յուր սանիկին և տեղյա՞կ է արդյոք, թե ինչի համար նա չի ցանկանում գալ Հայաստան: «Ես արդեն ասել եմ, որ ճիշտ կլիներ, որ ինքը գար Հայաստան, ոչ թե ձերբակալվեր Վրաստանում: Բայց ես տեղյակ չեմ, որ դրանից հետո հրաժարվում է Հայաստան գալուց, բնավ տեղյակ չեմ և չեմ էլ փորձել ճշտել»,- ասաց Կճոյանը: Վերջինից հետաքրքրվեցինք՝ իր սանիկի ձերբակալումից հետո՞ էլ է շարունակում պնդել, որ ինքը և առհասարակ իրենց եռյակը կապ չունեն օֆշորային սկանդալի հետ, ինչպես պնդում են Հայրապետյանը և փաստերը: «Ով որ այդպիսի հայտարարություն անում է, թե կապ ունենք դրա հետ, թող ինքն էլ պատասխան տա»,- վրդովված պատասխանեց սրբազանը:
Երբ փորձեցինք սրբազանից պարզել, թե ինչպես է պատահում, որ իրենց «եռյակի» անունը մշտապես շրջանառվում է տարբեր խարդախությունների մեջ, սրբազան հայրը գրեթե գոռալով և վանկատելով արտաբերեց՝ «ցը-տե-սու-թյուն»:
Հիշեցնենք, որ տարիներ առաջ նրանք նորից հայտնվել էին նմանօրինակ մի սկանդալի կենտրոնում՝ «քցելով» ՌԴ մի գործարարի՝ «Ռենովա» ընկերության տնօրեն Գեորգի Իոսիֆյանին: Նա հայտարարել էր, որ Հայաստանում իրեն «քցել» են 12 միլիոն ԱՄՆ դոլարի և դրա հետևում կանգնած են վարչապետ Տիգրան Սարգսյանը, ով այն ժամանակ ԿԲ նախագահն էր, Կճոյանի մեկ այլ սանիկ՝ Մհեր Ավետիսյանը, ով Jose ռեստորանային համալիրի սեփականատերն էր, և Նավասարդ Կճոյանը:
